Ke pueder eskrivir en este prinsipyo del anyo 2014?

Klara PERAHYA Judeo-Espanyol
2 Ocak 2014 Perşembe

Si...Ke eskrivir  ke puedra tener un sonido de sinseridad i de verdadera konviksyon personal?

Kada anyo, a semejante epoka, pronunsyamos automatikamente suetos i dezeos  ke savemos no seran nunka realizados o mizmo si muy raramente esto puedra produzirse, sera por azardo i en sirkunstansyas  fortuitas ke no mos konvensen de la intervensyon de una Entida omnisyente i todopoderoza.

Aun ke se trata de un fakto muy ansyano, tengo ainda en mis orejas la repuesta de un grande relijyozo djudyo al kual  tuve la impertinensya de  demandar komo   eksplikar la absensya de reaksyon  i el silensyo de ‘D.yo’ durante la Shoha. Despues unos kuantos puntos de refleksyon el me avia respondido kon muncho kalmo lo sigyente: ‘Desde el punto ande el ombre fue poseedor del “libre arbitro”, el solo tyene la posibilidad de desidir definitivamente i ansi  yeva la karga de la entera responsabilidad de sus aktos’. 

Segun un otro grande komentador: “En el pasaje del  Livro Santo ande Kain avia matado su ermano, pushado por su selo i su ravya por kavza del refuzo de  ‘D.io’ de resivir su ofranda,  kuando poko  antes El  avia akseptado kon plazer la  de Abel, la Biblia  eskrive: -Meti delantre de tu puerta el Byen i el Mal, eskoje el Byen-. Esta chika fraze no es un  orden  ma la formulasyon de un simple konsejo  sin la afirmasyon de un poder selesto imperativo.

Este mizmo komentador dize tambyen: “La tentasyon a eya sola no es una kulpa,  solo el fakto de perpetrar el akto kriminal  konstitue  un pekado”. (fin de sitasyon)

Si... keridos amigos, D.io  mos dyo  “la fakultad de pensar i ansi la libertad de desidir, El mos dyo el dono de djuzgar i ansi de disernir lo Bueno de lo Malo, lo ke introduze  la nosyon de responsabilidad.... Ansi, es a mozotros ‘kriansas pensantes’ ke inkumbe de eskojer entre “el Byen i el Mal”, entre “el esforso de paz i la voluntad de gerra”, entre “la solisitud i la indiferensya en direksyon de muestros proksimos amigos o enemigos”.

Komo fue dicho mas arriva, ‘la tentasyon del Mal, no es a eya sola un krimen, solo el fakto de perpetrarlo es un pekado difisilmente perdonavle’.

Semos todos konsyentes ke la natura humana es kompleksa, echa de luz komo tambyen de tinyevlas, de refleksos pozitivos komo igualmente negativos, meskla de sentimyentos munchas vazeses inekstrikables los unos de los otros, ma ke a varyos momentos prezentan chikas puertas de salida.

Profitaremos djustamente de estas chikas avyerturas  ke mos deshan persivir espasyos si no de luminozidad absoluta, ma a lo menos de kaminos verso la luminozidad, sufizyentes a kumplir aktos adekuados.

En estos primeros dias del anyo 2014 , alesharemos de mozotros, de muestro korason komo tambyen de muestros proyektos i aktos: ‘el selo’, ‘la rankor’ i ‘el odyo’ konsejadores de pleto i  vengansa.

En un momento de ravya i de ira, no abokaremos la kavesa delantre la tentasyon de danyar kualkyer persona.

 Mos ayudaremos mutualmente los unos los otros, ken ke seamos , riko o byen prove; kada uno tyene una koza a ofreser, ken kon su ayudo, ken otro kon la kontentes de un agradesimyento sinsero.

Komo mo lo disho en su artikolo de la semana pasada, muestra amiga Ceni Franko Gülnihal, akseptaremos de abashar asta el fundo de muestro korason para luchar kontra las malas tentasyones.

No djuzgaremos sin provas konkretas i esto ‘solo despues de aver bushkado i topado la razon de tal o tal akto’.

Penaremos a ser induldjentes i alesharemos de kualkyer persona ‘el reziko de sentirse arrebashado i humilyado’. No mos burlaremos de ninguno ni lo akuzaremos...al kontraryo miraremos de entenderlo...

Anyada buena a todos vozotros, amigos o enemigos, anyada yena de lusididad, de buenas intisyones ansi ke de buena voluntad i fuersa  para realizarlas.