Primera selebrasion del dia del Ladino en el mundo 5-9 Desembre 2013
Esti Şaul
El 9 de desembre fiestimos el primer dia del Ladino en el Museo Judio, el chiko kal Zulfaris transformada. Malgrado el friyo (ayaz), sus eskaleras altas,i su akseso difisil estava yeno mas ke 80 personas.
Me gusta de rengresiar muestro Grand Rabino, el Konsul de Espania, el Konsul de İsrael, presidentes de assosiasiones de muestra komunita.
Me gusta de rengresiar Silvyo Ovadia, presidente de muestra Assosiasion Sefaradita en Estambol, Karen Gerson Şarhon i Guler Orgun, i munchas personas ke estuvieron presentes para enkorajar muestro chiko grupo Ladino avlantes, ke tiene komo buto de azer sovrebivir una lingua (en veilleuse).
UNA PERSONA MUY MERİTANTE MANKAVA: KLARA PERAHYA.
Tuve mazal de konoserla antes mas ke 40 anyos. Mos pusho utilisar el Ladino i mos enkorajo a eskrivirla.
Mersi Klara por el pusho ke supites dar me.
İ ansi ke para otros sujetos.
Me gusta tambien de rengrasiar el direktor del Enstituto Cervantes, Pablo Assuero ke mos illumino kon su diskorso.
Puedo no sitar a mi Prof AndresVicens de la misma eskola?
Su pasiensya para aprendermos el Espanyol veridiko, ke mos sirvio a akodrar la lingua avlada por muestros aguelos; su kuriosita de kerer ambesarse muestro Ladino. Mersi Sn. Andres.
Un grande rengrasio a Rachel Bortnick (Dallas) muestra presidente mundial de ‘Ladinokomunita’ konsernando el Ladino una kollaborasion unika.
La direksion del Museo sovre todo Lisya İşman “eksik olmayın sağolun.”
Me va permeter de rengresiar los komplimientos ke me isieron por mi egsposision de pintura al olio.
Mizmo no munchos; alevantaron los ojos delantre mis ovras.
Un fotografo kon su kamera en la mano me dicho: “vos felisito Sinyora, esto bushkando un invitado ke se areta delantre de un tablo vuestro para travar una photo, ma kurioso no esto topando.
Para munchos anyos kon los jovenes aprendiendo el Ladino.
