A la okazyon de muestro 66. aniversaryo, las semanas pasadas ampesi la primera partida de este teksto. 29 Oktobre 1947 es la data de mi primer enkontro kon el Şalom. İ, ansi ampeso un atamiento ke deviya kontinuar anyos i anyos. Un atamiento ke se puede tambien kalifikar de lealdad (fidelidad). Asigun mi, esto es muy normal, syendo ke yo fui testigo de su kreasyon, de los esforsos del Sr. Avram Leyon (de b.m) i de su interminavle lucha.
Komo lo dishe en el teksto presedente, el Şalom fue komo un kompanyero miyo ke mos engrandesimos endjuntos, kontinuimos endjuntos… En realidad, no es enteramente egzakto ke mos engrandesimos endjuntos. Porke en el anyo 47 yo ya era una adolesente, lo ke viene a dizir ke yo so un poko !! mas aedada ke muestro jurnal. Enfin, esto es un detalyo. Lo ke ay de vero es ke syempre tuvo un lugar espesyal i mizmo importante en mi vida. Espesyalmente, estos anyos de alkavo, desde ke apartengo a esta ancha famiya, ay komo serka 15 anyos.
Desde el presipyo muestros kaminos estuvyeron en una paralela o se kruazaron de vez en kuando. Esto es un sentimyento miyo o una impresyon personal ke aki tengo difikultad a eksplikar.
En la mayoriya de mis tekstos konsernando mis rekuerdos de chikes, mensyono Galata. De una manera invariavle nombro tambien el Apt. Saffet Bey ande me engrandesi, pasi mis primeros 20 anyos. En el anyo 1947 normalmente estavamos ayi i en el mizmo imoble eramos vizinos kon el Sr. Leyon i su espoza La Sra Sofi. Eran de mizma edad kon mis djenitores. De sorte ke mi padre i Sr. Leyon eran amigos. Teniyan interminavles i seryozas konversasyones.
Kon tyempo, i yo bastanta kuryoza de saver i entonses una eleva de eskola segondarya me plaziya sintir estos dos ombres seryozos. Es por esta razon ke oy, puedo pretender aver konosido las difikultades ke konosyo el Sr. Leyon, komo me akodro tambien el “nasimiento” de muestro jurnal “malgrado los obstakolos i presyones” ke enkontro Avram Leyon.
Munchas vezes no me kontentava solo de sintir i me mesklava i yo a la konversasyon demandando un monton de kestyones. Es ansi ke me esto akordando el derecho de dizir ke fui testigo del nasimiento del Şalom. Portanto, devo atorgar un fakto.
Los primeros anyos de su aparisyon, enteramente en Judeo-Espanyol, no fui una lektrisa muy fervente. Era la epoka ke mos estavamos ambezando en fransez i naturalmente muevas amigas kon ken, afuera la eskola avlavamos solo en Turko. Naturalmente en la ambiansa entim i kayente de muestra kaza, kon mis avuelos, mis paryentes nunka deshimos de avlar el J-E. Syempre ago lores. Es unikamente de esta manera ke reushi a konservar muestra lingua ansestrala.
Otruna persona valutoza ke desho su “kashe” en la istorya del Şalom, es el defunto Salamon Bicerano. Mos akodraremos lo ke aviya dicho kuando la administrasyon del Şalom paso a muestro lugar aktual: “...fue una okazyon de fyesta, de alegriya para la famiya “Şalom”... Poko a poko i muestros lektores estan konsientes de las novidades ke estamos kumpliendo…Muestra gazeta deve adelantar de diya en diya i devenir una “Mozaika de Kultura”… Ke grande satisfaksyon seriya para mozotros de ver el “Şalom” komo un “Le Mondo” o un “Le Figaro”...
Desde su primera aparisyon en 1947, Şalom fue i kontinuo a ser el portaboz de la Komunidad Djudia. Kuanto a la idioma J-Espanyola no devemos permeter de olvidarla. Mizmo si es solo en una pajina, estamos azyendo esforsos para konservarla. Muestro jurnal poseda una ancha famiya. Asigun lo afirman muestras amigas, apartener a esta ancha famiya es un privilejyo. Esto i yo kompletamente de akordo. En desparte, yo me esto akordando un ekstra privilejyo. Porke sinseramente penso ke oy, son pokos los ke konosyeron Avram Leyon de serka i fueron testigos de sus esforsos i su lucha para kitar a luz el Şalom. Le sueto a muestra gazeta otros munchos aniversaryos i anyos de reushita.
