“Meti delantre tu portal ‘El Byen i el mal’, eskoje el byen.” (La Biblia)
Asta oy en dia, el mez de oktobre fue un enorme paradokse ke aŞrma una vez mas la ambivalensya de una humanidad ke se topa en sospenso entre las tinyevlas i la luz...
Vemos (guardyanos opinyatres de vyejos prinsipsyos ke no supyeron evoluar de una manera adekuada al konteksto sosyo-kultural de muestra epoka) individuos enganchados a un ideal echo de ‘intoleransya’ ansi ke de ‘refuzo del otro’, mizmo si ‘este otro’ es de su propya relijyon, individuos ke perpetran aktos kriminales debasho motivos pretendidos ser relijyozos, lo ke provoka gerras fratrisidas sin Şn ni atemo, matansinas i dolyo kaji kontinualmente.
Si...en esta momento, mos topamos delantre un kaos inekstrikavle no solo en el Oriente Medyo ma tambyen partikularmente en la Afrika, asta pushar ‘desmazalados ke se topan en el dezespero’ a fuir sus propyo payis sovre emberkasyones frajiles i medyas rotas, kon sus ninyos i mizmo rezin nasidos en los brasos, aŞn de eskapar de la mizerya i de las inegualidades de una diktatura inhumana, lo ke malorozamente provoka kon grande grande frekuensa aksidentes maritimos munchas vezes fatales.
Ansi fue del muevo nofrajyo serka esta vez de Malta, unos kuantos dias despues la terrivle trajedia ke avia akontesido a proksimidad de Lampedusa.... Muevas viktimas, muevo dezespero, mueva angusya. La Evropa (perpleksa i ezitante) se syente ferida en su konsyensya i en su sensivilidad, sin por esto pueder azer grande koza, kansa puedeser de resivir sovre sus tyerras ajenos ke no solo refuzan munchas vezes de adaptarsen a los uzos i kostumbres del payis ke los resive ma ke envezes keren mizmo diktarles sus propya manera de bivir.
El problema salyo de ser lokal o simplemente rejyonal i devino kaji mundyal, Konferensyas son organizadas en varyos lugares, sin malorozamente rezultados palpavles.
Las trajedias de algunos payizes sometidos munchas vezes a kondisyones de vida arkaikas i a una diktatura governomental inkonsyente de sus doveres, devinyeron tambyen problemas diŞsil a rezolver para el deredor munchas vezes en la imposivilidad de topar una kualkyer solusyon realmente eŞkas. Kual sea la dimensyon del ayudo ke vyene de ahuera, la verdadera luz es la ke espunta en el espasyo oskuro el mizno; el lavoro prinsipal deve ser echo aryento la masa konfuza de ombres i mujeres ke son aktualmente por la mas parte sin opinyon personal i ke se kontentan de segir los ojos serrados...
La luz kale kererla, la libertad kale luchar para obtenerla. Kual sea el apoyo ke vyene del eksteryor, estas dos grandes valores toman una real sinyiŞkasyon unikamente kon la propya aktividad i los esforsos de los ke son konsernados.
Ansi fue en un kazal del Pakistan ande una adolesente de 16 anyos nombrada “Malala Yousafzai” ke desde la edad de 12 o 13 anyos empeso a revoltarse i a luchar kon ardor kontra el estado de inyoransa en el kual son deshadas la mas parte de ijas i mujeres de su payis. Eya syempre insistyo para ke sus semblavles tengan la posivilidad de ambezarsen a eskrivir i meldar , lo ke avre munchas puertas.
Aunke muy kritikada en su propyo payis i mizmo en su propyo kazal, persigida i amenazada a muerte por talibanes salvajes ke la atakaron , eya eskrivyo a este sujeto un livro ke fue koronado por el Parlamento Evropeo, el kual le atribuo el premyo Sakharov.
En su diskorso a esta okazyon, Martin Schulz, prezidente de la dicha İnstitusyon, avlo ansi: “Aktualmente dozyentos i sinkuenta milyones (250.000.000) de ijas en el mundo no pueden ir libremente a la eskola; Malala Yousafzai esta luchando a este sujeto kon una ardor inkreivle , su egzempyo mos aze akodrar ke este derecho a la edukasyon de todas las adolesentes es munchas vezes olvidado , eya mos aze akodrar muestro dover i muestra responsavilidad....”
Si, la veredadera luz sera syempre la ke espuntara de aryento mizmo del espasyo oskuro, lo ke munchas vezes (temprano a tadre) ovliga moralmente el mundo eksteryor a intervenir para apoyar el esforso echo.
Ansi fue tambyen, por motivos diferentes i en sirkunstansyas i kondisyones enteramente otras, el destino de un chiko puevlo ke durante 2 milenaryos fue menospresyado i rondjado de lugar a lugar, munchas vezes mortalmente ferido en sus karnes, lo mas del tyempo las manos desnudas sin mamparo ni armas ma syempre tenyendo entre los dedos un livro ke para eyos iva avrir el akseso a munchos otros livros i asegurar su perenidad.
