Por la primera vez la Biblioteka Nasyonal de Israel mete en linea i ansi en estado de ser meldados via internet ‘manuskritos Hebraikos muy raros’ konsiderados komo unos de los mas importantes del mundo.
Aviad Stollman (el konservador de la Biblioteka) deklaro ke la koleksyon Palatina ke es kompuesta de 1600 dokumentos de la Edad Medya sera de mezmo disponivle ‘en linea’ en un futuro muy serkano.
El prechizo tambyen ke esta koleksyon kontyene una de las mas vyejas kopyas ke egzisten de la “Mishna”, teksto sentral del Judaismo
Stollman disho igualmente ke la Biblioteka de Israel esta en negosyasyon kon el Vatikan i la Universidad de Oxford para ke las koleksyones de estas dos Institusyones ke kontyenen manuskritos djudyos de una grande rareza, sean tambyen numerizidas
El konkluo en dizyendo ke el objetivo de la Biblioteka Nasyonal es de numerizar i meter en linea la totalidad de los manuskritos hebreos del mundo, lo ke les dara de muevo vida i les permetra de ser konsultados sin ser danyados ni estropeados.
