“Lampedusa une ile pleine de douleur” es el titolo ke la gazeta elektronika franseza ‘Le Monde’ dyo a un artikolo publikado alhad pasado, al sujeto de la terrivle trajedia ke fue el nofrajyo de una embarkasyon kargada de migrantes afrikanos dezeozos de alkansar la oriya de las tyerras evropeas, terrivle aksidente maritimo ke akontesyo en la Mediteranea, a kurta distansya de la chika isla italyana en kestyon.
Aunke isla turistika, Lampedusa devino desde un largo tyempo un sentro de migrasyon de afrikanos ke fuyen la mizerya de sus payizes kon la esperansa de topar tyerras hospitalyaras ke les ofriran la posivilidad de venser esta vyeja enemiga de todos los tyempos ke se nombra la ambrera.
No es la primera vez ke un semejante aksidente akontese en las mares avyertas, envezes kalmas ma munchas vezes furyozas i sin piadad, partikularmente para chikas embarkasyones frajilizadas ainda mas por kargas humanas ke sovrepasan sus kapasidad de rezistensya, ma esta vez la desgrasya se produzyo a 500 metros de la kosta i devino una terrivle trajedia, por falta (dizen algunos) de medyos immedyatos de intervensyon ke pudian muy probavlemente salvar lo maksimum posivle de vidas.
El peshkador Marcello Nizza ke se topava por azardo en mar serka del lugar del drama, pudo a el solo en su chika embarkasyon akudir una kuantidad bastante grande de desfortunados i despues de averlos deskargado sovre tyerra, kijo retornar para salvar otros, ma las otoridades del porto le disheron ke kalia asperar la lisensya de las Autoridades de Roma.
Estos ultimos anyos mos lamentamos ke syertos lugares del Oriente Medyo i de la Afrika devinyeron kaji tyerras de desgrasya ande la vida parese aver pedrido su valor fundamental. Ma, komo lo vemos, no son unikamente las tyerras de Siria, Ayifto, Libia, ets.. ke tomaron la aparensya de un enorme simetaryo de mansevos i ninyos sin defensya... las mares tambyen trokaron en abismos ke engluten desde un largo tyempo syenes i syenes de desmazalados persigidos por el dezespero.
Ken es el verdadero kulpavle de esta situasyon? Son nombrozos los responsavles, entre munchos otros, kuatro de entre eyos me vyenen al tino:
Kaji syempre, la vorasidad monetarya de algunos de sus dirijentes ...
Envezes “las viktimas eyas mizmas” ke en sus propyo lugar de nasimyento no azen syempre el esforso nesesaryo para salir a luz i no fasilitan el lavoro de los ke (mizmo si son raros) keren arrankarlos de sus apatia natural i de los vyejos uzos i kostumbres de sus trivyos, afin de integrarlos a un ritmo de vida mas adekuado a los tyempos prezentes...
Tambyen, la falta de obedyensa a un plano familyal ke puedra luchar kontra un eksesivo superpuevlamyente del payis, lo ke munchas vezes rende imposivle una verdadera mejoria de la situasyon ekonomika del lugar.
İ sovre todo, la indiferensya del entorno serkano komo leshano, esta terrivle indiferensya de “los poderozos” ke akseptan puede ser de ayudar finansyeramente, sin por esto interesarsen syempre al sujeto en su kompleta dimensyon.
Mos demandamos munchas vezes si realmente el progreso tekniko i el desvelopamyento syentifiko korijaron un poko las inegualidades entre los humanos.
La repuesta es: “Por seguro ‘Sİ’ en multiples kavzos … no se puede nyegar ke eyos permeten de triumfar de males ke eran inkuravles o de luchar kontra obstakolos ke paresian invensivles”…ma malorozamente eyos no pudyeron nunka trokar la natura humana, reanimar la indolensya de los unos o kalmar el dezeo salvaje de ‘otros’ ke syempre keren ser los mas fuertes, sin konsakrar una parte de sus tyempo a los desfortunados de este mundo.
