Rav Moşe Benveniste (Vice Prezidente del Konsilyo Rabbiniko de Turkia) serro sus ojos por syempre, a la sigida de un relativamente kurto i subito desrepozo ke lo arranko a la profunda kerensya de sus serkanos, paryentes, amigos i yahidim de muestra komunidad.
El era un Ombre de Ley i de Byen, syempre kudyozo i pronto a ayudar; el gio munchos mansevos i les transmetyo lo ke pudo de su propyo saver sovre el Talmud Tora... El savia tambyen oir lo ke dezia el otro i le respondia kon dulsor i sinseridad.
Syempre estriktamente fidel a las preskripsyones de muestra relijyon, el amava la vida i savia ser simple, sin orgolyo en su funksyon de Rav.
Kon su syensya Talmudika i su propya kondukta, el formo munchos de sus elevos i les komuniko un real entendimyento de la Ley.
Todos los partisipantes de muestra gazeta lo yoran.
A su Mujer i sus Ijos, a sus serkanos, paryentes i amigos, prezentamos muestras sinseras kondolensas i la ekspresyon de muestra profunda tristeza.
Ke su alma repoze en paz.
