Los judyos de Azerbeijan

Dora NİYEGO Judeo-Espanyol
2 Ekim 2013 Çarşamba

Situado en el bodre de la Mar Caspia (Hazar Denizi), i anturado por los paises Rusia, Armenia, Jorjia (Gürcistan), i İran, Azerbeijan tiene una populasion de mas de ocho miliones.

La majorita del puevlo son los shii muslumanes ke avlan la lingua turka. Oy, solo dodje mil judyos biven en el pais.

Los judyos bivieron en Azerbeijan munchos siglos. Dos grupos de judyos biven en el pais: los judyos achkenazim i los judyos montanyeros (los ke son de orijin Persia).

Los achkenazim vinieron en el dizimueven siglo, kuando un char ruso los forso de akseptar la kultura rusa. Un otro grupo vino en la segunda gerra mondial para fuyirsen de los Nazis.

Los judyos montanyeros vinieron en el sinken siglo. Azerbeijan los resivio kon grande plazer.

Sus antepasados bivyeron en el Sur de Azerbeijan, i dainda estos judyos avlan la lingua judeo-tat, o judeo-persiano. Kuando se fuyeron de la persekusion de İran, estos judyos bivieron en las montanyas, por esta razon, los yaman los judyos montanyeros. En el empesijo del ventien siglo, dainda eran jardinieros, i agrikultores.

La majorita de los judyos biven en Baku ke es la kapital del pais. El governo se komporta muy bueno kon los judyos. La konstitusion del pais da grande libertad de relijion al puevlo. El estado no teine una relijion fiksada. Tambien kristianos biven en el pais.

Mezmo ke tienen grande libertad, la ekonomia del pais los forso a los judyos a emigrar. La populasion de los judyos ke era 80.000 en los 1900, se aminguo a 12.000. Oy, los judyos montanyeros, los askenazim i pokos judyos de Jorjia (Gürcistan), forman la komunidad de Baku.

Kuba es una otra sivdad de Azerbeijan, ande judyos biven. La sivdad es divizada en dos partidas: los shiis biven en el norte, i los judyos biven en el sur de la sivdad ke es la rejion Slobada. En el empesijo del ventien siglo, mueve sientas i setenta i dos famiyas de los judyos montanyeros biviyan en Slobada, i teniyan onze Sinagogas, i vente eskolas judiyas. Komo no uvo antisemitizmo, i siendo leshos de los pogromes de la Evropa del Este, estos judyos ke bivyeron en pas kon sus vizinos, formaron una komunidad developada. Los judyos de Slobada bivyeron tanto repozados ke, Slobada fue konosida komo ‘El chiko Yerushalaim’. Ma, en el anyo 1928, los sovietikos ovligaron estos judyos a adaptar la alfabe latina en la lingua Tat, ke se eskriviya kon letras ebreas.  En el anyo 1938, los sovietikos serraron las enstitusiones judiyas, i las onze Sinagogas. Los komunistos mataron sinko rabinos, i embiyaron los otros rabinos a Sibiria. Duspues del kolapso de la Union Sovietika en el anyo 1991, la ekonomiya se deterioro en Slobada, i munchos judyos emigraron a İsrael, Amerika, i Evropa.

Oy, dainda biven munchos judyos montanyeros en Slobada. Estos judyos no son komo los judyos montanyeros de antes. Eyos son edukados, se visten komo evropeenos, i tienen buenos echos.