Ansi van los ombres ansi van las kozas

Klara PERAHYA Judeo-Espanyol
2 Ekim 2013 Çarşamba

Muestro tyempo esta yeno de chikos i grandes eventos, eskoji de avlar de enriva enriva de algunos de entre eyos… no se si son los mas importantes, ma kada uno es sinyifikante i puede tener su impakto sovre el enkaminamyento de la humanidad:

a) Asta ande puedra ir el ekstremizmo?

Ke  sean ‘djihadistos o Boko Haram’,’Haradim o Evanjelistos’, todos pretenden ser los  guardyanes los mas fideles de la fey a la kuala  eyos apartyenen, ma el ekstremizmo los pusha fatalmente a korromper las  raizes las mas profundas  de lo ke aze la esensya mizma de las tres relijyones  Monoteistas: ‘el  respekto por el Otro’.

Komo por seguro ninguno lo inyora, entre los sakros komandamyentos del Dekalogo (despues la afirmasyon de la Unidad de Dyo i la absoluta interdiksyon de kreer en falsas divinidades arkaikas) el primer orden ke mos fue dado es de ‘no matar’, no matar ni maltratar o traisar muestros semblables.

En este momento, La Humanidad esta leshos de aplikar estos Ordenes sakros. Ansi:

De una parte, Alhad pasado un grupo de islamistos de la sekta ‘Boko Haram’ atako una grande eskola en Nijerya, i mato a lo manko 40 mansevos, en el solo eskopo de impedir un desvelopamyento intelektual ke puedra permeter la emerjensya de opinyones diferentes de las ke se topan en los vyejos tekstos relijyozos del empesijo de la Edad Medya.

De otra parte. un Haredi de la sekta anti sionista ‘Naturea Karta’ (lakuala refuza de rekonoser la validez de la egzistensya del Estado de İsrael, por la sola razon ke es dicho en los livros antiguos ke un Estado Djudyo no sera kreado ke solo despues la venida del Mesiah) ‘un djudyo’ espiono i traiso sin remorso (al profito del Iran) su propyo payis ke, kualas sean sus opinyones, se esforsa de protejer kada uno de sus sitizanos.

b) La ambrera ‘ombro kon ombro’ kon una rikeza fabuloza:

La ambrera  ande ke sea,  fue i inkontestavlemente  es syempre una de las mas grandes desgrasyas de todos los tyempos i para muestra epoka  una koza inakseptavle, ainda mas en un payis riko komo el Qatar, reputado por su luso fabulozo ... Entonses eya toma  la facha de una trajedia de la antiguidad ande todo era kaos, peligro i inigualidad  i ande la kriansa humana se sintia entegrada a un azardo syego i implakavle.

 45 lavorantes nepalezos ke partisipavan por una mezada de mizerya a  la konstruksyon del futuro Sentro Esportivo ke vijitaran miles i miles de turistos durante la Byenal de football,  la kuala tendra lugar en el Qatar en 2022,  muryeron en el espasyo de dos o tres mezes, kaji todos medyos ambyertos por mankansa de komanya, i terrivlemente  desfuersados  debasho el sol kemador de un enverano sin piadad. 

Si... la  mizerya en eya mizma es una desgrasya kontra la kuala luchan multiples asosyasyones filantropikas sin pueder syempre venserla enteramente aunke ‘kada muevo paso echo’ konstitue en el mizmo una viktorya ke renforsa la esperansa de verla, un dia en el futuro, kompletamente  erradikada.

Ma ‘la mizerya ekstrema’ en un payis rikisimo i poderozo komo el Qatar kon su arkitektura grandioza i su lukso eksesivo, devyene revoltante, i lo mas sorprendyente es  ke se trata de un puevlo governado por una autoritad muy atada a las preskrisyones de su Fey.

Ke es la opinyon de la FİFA a este sujeto? Ke sera su reaksyon?

Todas las relijyones i partikolarmente las relijyones monoteistas repozan  sovre una ethika… En kada una de entre eyas, kualos sean  sus rituales, tradisyones o la intensidad de su espiritualidad , se topa komo un orden imperativo ‘el respekto de la vida humana’ i el ayudo a kualkyer persona en estado de peligro.