La Prensa mos ambeza ke antes de partir para Newyork ande partisipara a las diskusyones de la Asamblea jeneral de las Nasyones Unidas, el Prezidente İranyano Hasan Rohani demando ke el Oksidente rekonoska el derecho de su payis al enrikesimyento de Uranium.
Desde djueves pasado, el yama los governadores oksidentales a aprovecharsen de la oportunidad ke ofrese aktualmente su nominasyon a la kavesa del Governo Iranyano, para estableser un dialogo konstruktivo.
El disho. “El puevlo İranyano demanda la akseptasyon de todos sus derechos i partikularmente de su derecho a desvelopar el enrikesimyento de Uranium sovre su tyerra, en el kuadro de las reglas internasyonales” …. “El Iran no kere fabrikar la bomba atomika”… ’’El puevlo İranyano es un puevlo rasyonal, dezeozo de paz i de amistad. El esta pronto a kooperar afin de reglar los problemas de la rejyon i de munchas otras partes del mundo.”
Es evidente ke el muevo prezidente İranyano afisha klaramente, kon insistensya, su voluntad de azer arrebivir las vyejas relasyones entre su payis i los Estados Unidos de Amerika komo de Evropa, en el eskopo byen entendi de pueder salir de la dezastroza situasyon ekonomika ande se topa su puevlo.
La koza es resivida kon prudensya i sirkonspeksyon de parte de los Estados Unidos i de munchos governos evropeos mas o menos sorprendidos por esta buelta radikal de la politika Persana, partikularmente despues los obskuros anyos de la epoka de Ahmedinejad, epoka ande la mayoria de los ayetolahes (ke konstituen el verdadero sentro de la direksyon politika del payis) kedaron kayados i sin ninguna reaksyon kuando el presedente prezidente afirmava su dezeo de destruir i kitar de la karta jeografika de la rejyon el Estado Ebreo.
İsrael de su parte esta muy dubyozo, mizmo sospechozo i muy inkyeto konsernando el peligro ke konstituen semejantes deklarasyones afin de obtener la libertad de fabrikar la bomba atomika, lo ke sera un fakto muy perikolozo para el Estado Ebreo.
La mas chika akseptasyon (de parte de los payizes oksidentales i sovre todo de los Estados Unidos) konsernando el enrikesimyento del potensyal aktual de Uranium riska de krear una situasyon sin retorno; i komo disho un djornalisto Israelyano: “no se djuga kon ‘habitakhon’ (la seguridad del payis).
El Ministro İsraelyano de la Defensa Moshe Ya’alon dize “es verdad ke el muevo Prezidente İranyano mostra una facha muy pozitiva ma el no azera ninguna konsesyon konsernando el sujeto Nuklear. No kale olvidar ke Hassan Rohani fue elijido kon la permisyon del Leader Supreme del payis ‘el Ayatollah Ali Khamenei.”
Si ….Es ansi del eternal destino de İsrael, syempre instabilidad i peligro, syempre inkyetud…
“2000 anyos de diaspora, de persekusyon i menospresyo en kaji todos los payizes del mundo i prinsipalmente la trajedia inhumana de la Shoah” desharon en el esprito del puevlo djudyo un tromatizmo dolorozo ke lo ovliga a ser kontinualmente inkyeto i kontinualmente en estado de alerta.