Kada anyada mueva es la puerta de un presipyo (başlangıç); de un empesijo. Para las personas el anyo muevo es la signifikasyon de las muevas emosyones, muevos dezeos, muevos akonsintimyentos.
Dingunos de mozotros no somos perfektos. Todos penamos kontinualmente para ser una persona mas buena.
Unos de mozotros keren aflakarsen, otros no keren mas fumar, u el buto de otros es avansar moneda.
Ken de mozotros keren ser mas pasensyozos, otros mas ordenados (düzenli), otros tolerentes...
Bueno; para empesar a trokar deke eskojemos los primeros dias de la anyada mueva, i non los dias ultimos de la anyada pasada?
Las personas tyenen una abitud de tomar muevas desizyones en entrando a una anyada mueva i kale desidar de kontinuar a esta atitud (davranış) buena durante el anyo.
Por egzempyo; para resolver todo en un punto, se prefera de empesar kon pasoz çikos.
Kale ser realistos.
Puedemos tomar una desizyon por egzempyo; de azer mas munchos egzersizyos, para pueder aflakar i konservar la sanedad. Para koryer un kilometro u kaminar kada demanyana ke es difisil en invyerno kon las luvyas; kale azer en kaza vente puntos de movimyentos, o demanyana o la noche.
No por sedaka (sakın ha) no vos arrepintej.
Este anyo pensaremos i mos kreeremos veramente de aryento muestros korasones; ke va ver pas en el mundo, ke la umanidad no va pensar mas a lo negro; i va penar para ke el mundo se aga mas ermozo de dia en dia.
Para empesar; bushkaremos imediatamente un amigo ke pensa ke mos olvidimos de el.
Purifikaremos muestros meoyos, de las entisyones negras i del selo.
Estaremos mas delikados kon muestro entorno i mas finos.
Azeremos komplimentos a las personas para ke seygan orozos.
Mos olvidaremos las incustisyas ke mos izyeron.
Sintiremos mas muncho i estaremos atantivos.
Kuando estamos incustos; no mos absteneremos(çekinmek) de ekskuzarmos.
Daremos emportansa a las ideas diferentes ke no son las muestras.
Kuando mos atristamos (üzülmek) o mos inyervamos mos demandaremos de si para si:
Esta problema va ser tanto emportante despues de dos semanas?
Kuando tenemos menester de koraje, mos sugjeraremos (telkin etmek) de si para si.
No mos olvidaremos de sonreir (gülümsemek) mas muncho.
Teneremos mas muncha tolerensya.
No es fasil de azer esto todo; ma kale empesar kon kreensya (inanç).
I lo ke es provechoso de lo ke akomplimos este anyo, formara (teşkil etmek) una eskalera para el anyo venidero.
No kale arrepentir (vazgeçmek) de las desizyones ke tomimos.
Una anyada mueva, es un avenir muevo. İ la vida va pasar ansi, kon muevos dezeos, ilusyones (düş), emosyones i ideas....
Agora ke ya pasimos muevamente; la semana de Rosh-Ashana ke es una de las fyestas la mas emportante i el dia de arrogar al Dyo, en sintyendo el Shofar para orasyonar por el anyo muevo; por la sanedad, la felisitad i por la pas i amor en el mundo entero.
Los djudyos toman muevas desizyones; se eforsan a purifikarsen de sus manyas; i tyenen la kreensya ke van a estar pardonados de sus pekados de la parte del todo Puederozo.
Todos los aravyados kale ke se agan pas, ke se rekonsilyen antes de Rosh-Ashana para entrar sin pekados al anyo muevo.
Todas las promesas (vaat) son ovligadas de realizarsen para ser una persona mas humilde (alçakgönüllü) i para ser mas fruktuozos a la umanidad.
Estaremos todos eskritos en los livros santos...
Eskritas buenas i el Dyo ke mos guadre de las kozas ke no mos puedemos guadrar...
