“Meza de İftar”

Segun lo ke meldamos en la prensa internasyonal: despues de una ruptura de 3 anyos, lunes la tadre 29/7, los reprezentantes palestinyanos i Israelyanos se enkontraron de muevo en una atmosfera de buena voluntad resiproka, al torno de ‘una Meza de İftar ‘ ande Tzipi Livni i Saëb Erakat fueron asentados lado kon lado . Se topavan tambyen prezentes el Sekretaryo de Estado Amerikano John Kerry i varyos otros reprezentantes .

Ansi se paso, en Washington, el primer kontakto İsraelo-palestinyano ke sera byen entendido segido por negosyasyones bastante duras ande los protagonistos de las dos partes devran por seguro azer sakrifisyos dolorozos afin de ayegar enfin a una paz duravle. John Kerry demanda imperativamente ke ninguna ruptura intervenga antes 9 mezes de diskusyones i de esforsos mutuales

Mahmud Abbas saludo el akordo del governo Israelyano a la liberasyon de 104 prizyoneros palestinyanos i disho lo sigyente: “Estimamos ke se trata de un momento importante i tenemos la esperansa ke vamos a reushir a profitar de la okazyon ke mos es oferta grasyas a los esforsos de la administrasyon Amerikana, para ayegar a un akordo de paz duravle i djusto”.

Ke sera el rezultado ? ninguno lo save egzaktamente, ma esta vez se puede dezir ke se syente de las dos partes, un real dezeo de ayegar a una solusyon akseptavle.

La liberasyon de los 104 akulpados palestinyanos entre los kualos algunos tyenen malorozamente sangre djudia sovre las manos, djugo un rolo muy importante, porke es un akto portador de un mensaje de muy buena voluntad de la parte İsraelyana. Esta desizyon fue tomada por el governo kon 13 votos pozitivos , 7 negativos i 2 abstensyones.

La koza no fue realizada muy fasilmente, munchos myembros del governo komo del parlamento İsraelyano fueron kategorikamente kontraryos a este djesto de induljensya. Benyamin Netanyahou les disho ‘’ Aktualmente, me parese ser de la mas grande importansa kel Estado de Israel entre en nogosyasyon kon su vezino : Es importante por dos razones mayores: 1)’para maksimizar las posivilidades de meter fin al konflikto kon los palestinyanos’ i tambyen 2)’para renforsar la pozisyon de Israel sovre el plano İnternasyonal’.’’

Responsavles amerikanos seran prezentes a las negosyasyones en kestyon, dirijidas de la parte Palestinyana por Saëb Erakat, i de la parte Israelyana por Tzipi Livni akompanyada de Yitzhak Molho emisaryo personal de Benyamin Netanyahu.

Una orasyon suve del fundo de mi korason de mujer aedada, una orasyon ke personalmente pronunsyo kada noche delantre la Mezuza ‘’Ke ninguna madre ni ningun padre en el mundo, de ke konfesyon ke sea, yore nunka por la muerte de una ija o un ijo” Amen.