“Kreo ke la Paz kon los Palestinyanos devino mas urdjente ke en el pasado. Eya es una nesesidad. Eya es krusyal. Eya es posivle. Asperar puedra disminuir sus posibilidades de reushita. İsrael i los Palestinyanos son, segun mi djuzgamyento, maduros para reempesar negosyasyones de Paz”---Shimon Peres
Martes pasado en Israel, Shimon Peres fyesto sus ‘90 anyos de vida’ en una atmosfera de immensa amistad, entornado de todos sus keridos, amigos i partizanos komo tambyen de los ke en el Governo Israelyano no partajan enteramente su ideal pasifisto.
Shimon Peres es el ombre de Estado el mas aedado del mundo politiko, komo tambyen el mas amado de su puevlo. Konsiderado komo un “inoksidavle optimisto”
el es ainda mas apresyado ahuera de su payis.Tony Blair disho un dia a un diplomato djudyo: “Mozotros tenemos la Reyna Elizabeth i vozotros Shimon Peres”.
Komo mo lo ambeza la prensa, misivas de grande simpatia i de sinsera apresyasyon le fueron mandadas de parte de diferentes grandes personajes byen konosidos del mundo, rivalizando de elojyos al sujeto del ‘Premyo Nobel de la paz ke syempre ovro para estableser una situasyon de ‘no belijerensya’ en la rejyon. Entre munchos otros: Barack Obama, Angela Merkel, Mikhael Gorbatchev, Vladimir Poutine, François Hollande, el Papa François, Ban Ki-moon, el Rey Juan Carlo, ets... ets... lo felisitaron i le auguraron larga vida.
En su mensaje, el prezidente de los Estados Unidos Barack Obama lo kalifiko de “Leyenda biva”.
Un djornalisto fransez disho a este sujeto, kaji tekstualmente lo sigyente: (traduksyon) “Martes la noche el 18 Junyo, fue prezentada la epopea de Shimon Peres, aktual Prezidente de İsrael, vyejo primer ministro, artizano de los akordos de Oslo i del programa nuklear de İsrael, ombre de paz i ombre politiko envezes kritikado por las sinuozidades de su karyera, instalado oy en dia sovre el pyedestal del Ombre de Estado el mas amado de los İsraelyanos.
A 90 anyos, el rende syempre grandes servisyos a su payis, entre los kualos el de prezentar un imajen de toleransya i de pasifizmo ke kontrasta kon el del shefe del Governo.”
En efekto, Shimon Peres no fue nunka realmente un militar de karera, ma la mas parte del tyempo un ombre de aksyon diplomatika... A la eksepsyon del momento de la kreasyon del Estado Israelyano, el no eskojo nunka las armas para venser sus adversaryos, ma ‘la persuasyon’. Su eskopo fue syempre la persuasyon i la harmonia.
Ombre de dialogo, el save oir lo ke dize el otro i se esforsa de entenderlo, lo ke deve ser en realidad el presepto de baza del Djudaizmo en su esensya humanista.
Shimon Peres no es solo “una leyenda biva”, el es (mizmo si esto puede pareser oy una utopia) un luchador las manos desnudas ke tyene syempre en el korason el dezeo de ayegar sin amargura a una situasyon de paz ke un dia puedra devenir ‘ayudo resiproko’ i tambyen (deke no?) ‘karinyo’ entre dos payizes vezinos anteryoramente enemigos.
Esto se realizo unos kuantos siglos antes en los Estados Unidos entre el Norte i el Sud; i aktualmente esto se esta penando a realizar en la Evropa, aun la dezastroza situasyon ekonomika aktual.
Deke no luchar para mirar de azer lo mezmo en un chiko kanton del Oriente Medyo?
Es inkontestavle ke el Galud desvelopo (en la dolor mizma de su ser) el Sehel del esprito djudyo; deke no azer de el, de este sehel, la sola arma realmente valida?
Karyera diplomatika de Shimon Peres segun Wikipedia
Segun lo ke mos ambeza el sityo elektroniko Wikipedia, Shimon Peres fue en varyas okazyones ministro en diferentes departamentos del Governo İsraelyano antes de ser nominado Prezidente del Estado de Israel
El okupo el posto de Primer Ministro (por interim) en 1977, ansi ke primer Ministro eskojido de 1984-1986 i de 1995 a 1998.
Kapo del partido travayisto durante nombrozos anyos, el se adjunto al partido sentristo Kadima en 2005.
Premyo Nobel de la Paz en 1994 kon Yasser Arafat i Yitzhak Rabin, Shimon Peres fue elijido ‘Prezidente del Estado de Israel’ el 13 Junyo 2007.
Ansi, el es el primer shefe del Estado djudyo a aver asumido prealablemente varyas funksyones ministeryales i partikularmente a aver okupado la funksyon de ‘kapo de Governo’ antes de ser elijido Prezidente del Payis.
