En el presipyo del mez de Avril meldimos en el Şalom una novela dizyendo ke la ansyana Sinagoga se va azer un Sentro de Kultura. Antes kaji un anyo, en muestro jurnal tambien meldimos sovre la restorasyon de la sovredicha Sinagoga ke estava en estado de kayer en ruvinas. Ma no me esto akodrando si el eskopo de la renovasyon o (restorasyon) se estava indikando en akeya novela.
Oy, ya konosemos el eskopo. La fragua fue restorada por la Direksyon Lokal de Fondasyones. Transferada a la Universidad de Gaziantep, entonses va servir komo un Sentro de Aktividades Kultural. Komo ya se save, asta una perioda no muy leshana, en esta sivdad bivyo una Komunidad djudia ke emigro a otras sivdades verso la fin del anyo 1970. En la inogurasyon del muevo Sentro Kultural, asigun lo disho i el Direktor de la Fondasyon: “Esta fragua servyendo komo Sinagoga, estava en ruinas. Respektamos toda kreensa. Kijimos valorizar esta fragua ansyana. Las ovras desparesen si estan vaziyas...”.
Antes unos, kuantos anyos, se aviya realizado en Estambol, en dos lugares diferentes, dos ekspozisyones tratando el mizmo sujeto: “Sinagogas de Turkiya”. Asistimos a la prezentasyon del album/livro i la ekspozisyon del lavoro “Las Sinagogas de Turkiya”, ovra presyoza formada kon el lavoro vizual del Sr. İzzet Keribar i los tekstos del Sr. Naim Güleryüz. A la epoka seya en “El Amaneser” seya en el Şalom, dimos el kuento rendido del evento, ekrivimos en ancho sovre esta aktividad, izimos o transferimos komentaryos.
La otra ekspozisyon, lakuala tiene un syerto raporto kon el teksto de este artikolo, fue la del Palasyo Topkapı, kon el eslogano: “Las Sinagogas Historikas de Turkiya”. Esta ekspozisyon fue realizada por la Komunidad Djudia de Turkiya, debasho el “Patronaje” del “Ministeryo del Eksteyor”(si no me yerro).
La sovredicha ekspozisyon era el rezultado del lavoro “The Historic Synagogues of Turkey”, del Sr. Joel A. Zack, arkitekto amerikano. Un lavoro de intensas bushkidades empesadas en el 1996. Un livro/katalogo fue tambien publikado, dando anchas eksplikasyones en turko i inglez. Enrikesido tambien kon las inkomparavles fotografiyas del Sr. Devon Jarvis, este katalogo es un manadero presyozo de referensya.
Durante su largo viyaje a traves la Turkiya, el Sr. Zack incho ojas, tambien en su “diario” ke tuvo. El Sr. Zack en su diario eskrivyo notisyas, rekuerdos striktamente personal, konsernando syertas sivdades ke vijito myentres su largo viyaje de bushkidad. De vez en kuando, yo relati unas, dos de estas pajinas ke tresladi del diario. Es, tambien el eskopo miyo oy, en azyendo este teksto de dos partidas.
En la prefasya del livro (katalogo), el Sr. Zack dize: “En munchas sivdadikas chikas no bive entonses dinguna Komunidad Djudia. De sorte ke fuimos ovligados de aserkarmos de los aedados de la sivdad para demandarles si se akodran del sentro ande biviyan los djudios. Muy frekuente mos miravan de una manera etranya, dubyoza i de vez en kuando, kon syertas reaksyones. En vezes reushimos apanyar algunas shanses de enformasyon..”.
Fue de esta manera ke la ekipa de bushkidad pudyeron tomar enformasyones de syertas Sinagogas, espesyalmente de las sivdades del Sud-Este de la Turkiya. Sivdades komo Kahramanmaraş, Antakya, Gaziantep ets..
Aki esto metyendo el punto final de la primera partida de mi teksto. Si no ay dingun impedimiento, vamos a kontinuar en los diyas ke vienen. Penso relatar otruna vez la pajina del diario de Joel A Zack, ande esta kontando el epizodio de Gaziantep. Va ser komo un ultimo rekuerdo nostaljiko de la Sinagoga de esta sivdad.
a kontinuar...
