Treser Alhad de Junio, oganyo el 19, es el “Diya del Padre”. Mizmo si no es muy ansyano, este diya tiene un pasado de kaji un Siglo. Tambien, istoryanos afirman ke en la Roma Antigua ya se selebrava un diya semejante. Komo el “Diya de la Madre”, i este diya es orijinario de los Estados Unidos. Las estoryas son diversas, ya las tengo kontado en los anyos presedentes. Oy kero avlar de otras jeneralidades i eskrivir unos, dos paragrafos diferentes.
Syempre tuve la impresyon ke el Diya del Padre kedo un poko en la solombra del “Diya de la Madre”. En todo kavzo no son los padres ke kedan en la solombra, es el diya, o diremos las selebrasyones kek edan. El padre, idolo del ijo, primer amor de la ija, komo pueder kedar en la solombra?..
No me plaze muncho el titolo de “shef de famiya”, ke se da muy frekuente a los padres. Porke penso ke es en kontradiksyon kon la nosyon de igualidad entre los djenitores. Ma no ay dingun impedimiento al dizir ke el padre fue syempre el “pilar”, el simbolo de siguridad, i djuntos kon la madre, el giador i protektor de la famiya.
“.. Asigun syertas investigasyones i enkuestas de antes 30-40 anyos, los padres pasavan kon sus kriaturas menos tiempo ke la madre. İ tambien tomavan muy chika responsabilidad en elevando i edukandolos”. Frankamente no esto konvensida de la djusteza de esta konkluzyon. Kero pensar ke izyeron las enkuestas en lugares i ogares yerrados!!
Ya es verdad ke syempre el padre fue el ke lavora, el ke “trae pan a kaza”. İ la madre syempre fue la ke se okupa de los chikos en kaza. Porke muestras madres no lavoravan... Bueno, esto kedo muy leshos i no era una situasyon ke deteniya a los padres, o a syertos diremos, de okuparsen de la edukasyon, de la instruksyon de sus ijos. Antes 70 anyos i mas, afilu yo lo bivi esto, mis ermanikos tambien. Syempre mi padre se okupo de mozotros, aun ke viniya kansado del echo. Ma devo atorgar ke no fue la mayoriya, la jeneralidad de los padres ke izyeron ansi. Lo djusto por lo djusto, estamos remarkando ke oy, estan tomando una parte aktiva, al lado de la madre. En una manera, el rolo “tradisyonal” del padre ampeso a trokar. Klaro ke, syempre es el “pilar” del nido, el ke trae pan a kaza.
Todo en konservando estas kualidades, s’enrikesyo i kon otras: ayudar en kaza a syertas okupasyones, ser amigo de djugo de los ijos, ayudarlos en las lisyones, azer spor, ir a la mach endjuntos kon eyos ets... La relasyon pozitiva i amikal entre padre i ijos, es una asiguransa para eyos...
En instalando una disiplin i otoridad dura, estrikta, el padre lo ke puede sembrar es espanto en los chikos korasones. Ma aki en dizyendo ansi, no kero ke ayga malentendido. En avlando de relasyon amikal, esto no deve ser entendido komo deskararsen. A la kontra yo syempre pensi ke seya la madre, seya el padre deven konservar una doza de otoridad i no akseptar todos los kaprichos de sus kriaturas i mankuras de respekto.
Puedo afirmar ke no es fasil de ser padre. El merese no solo un diya espesyal ma, 365 diyas ansi ke lo penso i por las keridas madres. La kerensya, la abnegasyon de un padre, de una madre, son la luz ke nunka se amata i arrelumbra el kamino de sus ijos en toda edad.
