Barbara Streisand En İsrael

Coya DELEVİ Judeo-Espanyol
12 Haziran 2013 Çarşamba

Barbara Joan Streisand, famoza kantante i aktrisa, nasyo el anyo 1942 en los Estados Unidos de Amerika, en el distrikto Brooklyn de New-York. A partir de los anyos 1960, ampeso a ganar grande popularidad de komedyena i kantadera. Despues de aver segido korsos para devenir  komedyena, lavoro komo “ Singer” (kantante) en los “Night-Club”es. Performo en Brodway diversos djugos muzikal i en uno de estos, el “Funny Girl” (la ijika komika”, gano grande sukseso el anyo 1964.

Entervalo izo una seriya de albumes de Muzika Popular, tambien muy reushidos. La karyera de muzik le trusho nombrozos premios de “Grammy”. En 1968 echo sus primeros pasos en el mundo del Sinema, ande tambien gano grande sukseso i se izo un rezyo renombre de “Star”. Su djugo de Brodway, el “Funny Girl”, esta vez interpretado en el Sinema, le izo ganar el “Oscar” en el anyo 1968. Todo en djugando en filmos, kontinuo su karyera muzikal, azyendo albumes, performando en konsiertos i programes de T.V.  Barbara Streisand, al lado de esto todo en unos o dos filmos ande fue la aktrisa prinsipal, se okupo tambien i de la direksyon del  tornaje del filmo, fue la direktrisa (rejisora).

Despues de akodrarmos en kurto la biografiya de esta renomada artista, kero tornar al sujeto indikado en el titolo de este teksto. Mezo un serkano resivi resientemente el “Milim Digital” No.164. Una revista bien enteresante. Profiti de su otorizasyon de pueder reproduizir kualkyer artikolo o pasaje, a kondisyon de indikar la fuente. Ansi es ke esto dando esta novela ke meldi en Milim.

“Barbara Streisand, la artista Amerikana de raiz djudia, va arresivir en el mez de Junio el titolo de “Doktora Honoris Causa”, de la parte de la Universidad Ebrea de Yerushalayim”. El Sentro Akademiko komuniko las razones de atorgar a la artista el sovredicho titolo: “Reushita Profesyonal, grande altruizmo, sus lavoros sovresalientes en todo lo ke konserna seya  los derechos umanos i seya los siviles, su dedikasyon a Israel i al Puevlo Djudio”…

“Barbara Streisand aktualmente, aedada de 70 anyos va resivir el titolo onorifiko en “Filozofiya”. En Junio eya va aktuar por primera vez en Israel. Esto, myentres la selebrasyon del 90. aniversaryo del Prezidente Israelyano, el Sr. Shimon Peres. Asta oy, Barbara Streisand, famoza kantante , aktrisa i  direktrisa de 70 anyos, estuvo munchas vezes en Israel. En munchas  okazyones, tuvo obtenido fondos para este pais. Tiene interpretado en direkto el imno nasyonal  del  pais. Portanto, se puede dizir ke nunka tuvo la oportunidad de suvir a la  shena en Israel”.

“Su primer “Resital” tiendra lugar en medyo de este mez (Junio) en un estadyum de Tel-Aviv, delantre de 40.000 personas. Despues seguira una “Gala de Inogurasyon de la “Konferensya Prezidensyal de Israel ke se selebrara el 18 de Junio en el “Sentro Internasyonal de Konvensyon”, en Yerushalayim”.

Aki repetaremos ke Barbara despues de su primer Oscar en 1968, fue nominada otra vez en 1973 por su papel prinsipal “The Way We Were”, myentres ke su sigunda “estatueta” la gano en 1977, esta vez en la kategoriya de “ Mijor Kantika Orijinal” kon “Evergreen”…