I de muevo el mundo en rebuelta

Klara PERAHYA Judeo-Espanyol
12 Haziran 2013 Çarşamba

El mundo de muevo en rebuelta .... de muevo, deskontentes, ira i sanya.

En estos ultimos siglos de grandes deskuvyertas i rezultados syentifikos ansi ke teknikos ekstraordinaryos, la kriansa humana parese aver pedrido el ekilibro de su pensamyento i de sus desizyones.

Los ombres se topan en este momente en estado de pleto kontinual los unos kontra los otros en kaji kada parte del mundo, no solo en  la Afrika del Norte en su lucha kontra el despotizmo, ni en el kontinente aziatiko o en  el Oriente Medyo... de mezmo no solo  entre orijinaryos de kualkyer payis ke ya tyenen un orden establesido i  imigrantes muevamente instalados ke keren introduzir sus propyos uzos i kostumbres, ma entre sitizanos kaji ermanos de una mizma sivdad  ke mas o menos konosyeron i ovedesyeron  desde sus chikes a los mizmos preseptos.

Vemos kon una frekuensya de mas a mas grande  en la Evropa  komo tambyen en la Amerika del Norte  ke son los promotores del liberalizmo ansi ke de la demokrasia i de la laisidad, aktos de inimistad perpetrados kon una brutalidad munchas vezes destyal.

En los Estados Unidos: kontinuales faktos kriminales ande inosentes son de mas a mas las  viktimas... en Fransya tambyen, en el payis de Descarte, Bergson, Camus i René Cassin, se ve kon una grande frekuensya, aktos de vandalizmo entre sitizanos de mizmo orijen, komo por egzempyo fue el kavzo la semana pasada en un litijyozo  entre dos grupos de mansevos de ideolojias opozadas ke kosto la vida a Clément Meric  briyante estudyante de la prestijyoza Grande Eskola. nombrada “Science Po”.

Es una realidad inkontestavle ke kada persona, ken ke sea, tyene su propya vizyon del mundo  segun sus eksperyensas individuales, su propyo karakter i tambyen su estado psishiko, kada individuo ve la mizma koza de manera diferente i en kada una de estas vizyones se topa por seguro una parsela de verdad, ma kaji nunka la verdad entera.

Es ke un dia el odyo puedra ser vensido en el mundo? Una kestyon ke obseda munchas personas...Al pareser los humanos se olvidaron de diskutir kalmamente en el solo objetivo de azersen oir i entender , sin esta pretensyon loka de kerer syempre kovenser...el ombre (a niveles de intensidad byen entendido diferentes) se olvido de oir lo ke dize el otro...Oy en dia, el akto de brutalidad remplasa de mas a mas la repuesta verbal a kualkyer argumento ke  no mos konvyene.

De ande provyene este dezeo kaji instinktivo de syempre refuzar  brutalmente de ser  vensido? falsa ‘voluntad de potensya’ ke es mas un sentimyento de vano orgolyo ke de superyoridad .

El filozofo fransez ‘Alain’ insiste sovre la nesesidad de interpretar  la ekspresyon “Vololuntad de Potensya” no en el senso komun de potensya sovre los otros, ma de ekspansyon  de muestro ‘Yo’ .  

La real voluntad de potensya es ansi “esta voluntad de syempre kerer ir mas arriva  de lo ke semos en muestro ser ...akto de sovrepasar no el otro ke mozotros, ma mozotros mizmo”.  

No kedaremos kontinualmente atados syegamente a lo ke mos parese ser djusto, sin mirar lo ke se topa o se pasa en muestro entorno, eskucharemos lo ke dizen los otros, mos esforsaremos (de las dos partes) de entendermos los unos los otros sin prejuisyos prealavles,afin de pueder topar lo ke  realmente es lo mas serka de la verdad.