Oganyo estamos bivyendo una sezon indechiza. Desde los primeros diyas de Avril konosimos kalores no azyendo bushkar las de Junio. Komo lo dishe en mi artikolo presedente, oganyo no pude azer mi artikolo abitual!! sovre la Primavera. Adjusti tambien ke el mez de Mayo es largo, de sorte ke ya tengo tyempo dayinda. Resientemente, meldi djustamente en un artikolo estos byervos ke tresladi: “El ken kere ke diga lo ke kere, en la natura, en Estambol i en los korasones, la verdadera Primavera ampesa en Mayo”. El autor del artikolo esta kontinuando en azyendo aluzyon tambien a las fyestas i diyas espesyal del sinken mez del anyo…
Bueno…Para mi, los sinyos konkretos del arrivo de la mueva sezon, son los arvoles delantre mi ventana. En realidad, todo el largo de muestra kaleja, en las dos partes de los trotuares, tenemos arvoles ke ampesan a dar desde fin Marso, una abondansa de ojas vedres. Son el rekuerdo ke mos desho la Sra. Fatma Girik, ke a una epoka fue Prezidente de la Munisipalidad de Shishli. Aparte de esto, ay unos, dos anyos, debasho de los arvoles, la Munisipalidad aktuala formo “platanas” de flores de diversas kolores, lo ke esta ermozeyando muestra kaleja.
Unos dizen ke la Primavera viene kon las margaritas en las kolinas i los kampos. Otros dizen ke sin ver los arvoles de “Erguvan” kon sus flores roz-lila, no se puede dizir ke ya vino la Primavera a Estambol. No konosko el nombre de esta planta en judeo-espanyol. Los etranjeros la konosen komo “Judas Tree” (arvole de Yehuda). Tengo sintido ke la kolor de sus flores tiene dado lugar a una leyenda, ma no me la esto akodrando. Par kontra ya se ke fue la kolor “ofisyal” del İmperio Bizantino. De ande ande!!.
Otra flor de la Primavera es la “tulipa”, uno de los simbolos de Estambol. Se organiza afilu un “Festival” a su nombre. La vemos en todas las partes de la sivdad kon sus formas i kolores diversas, esta flor ke dyo su nombre a una epoka del İmperio Otomano. El “Emirgan Korusu” ke es “La Arvoleriya de Emirgan” es uno de los mas ermozos lugares de ir en esta sezon.
Es un pedaso de la kuvyerta de vedruras del Bosfor. Las tulipas multikolor ofresen una vista maraviyoza, una fyesta para los ojos, tambien i las “magnolias” ampesando a enfloreser i a dar sus ermozo parfum. Esto todo da un imenso plazer a la persona. Las flores syempre fueron mesajeras de muestros sentimientos de kerensya, de amistad i siguro de amor. Son para munchos, unos de los detalyos agradavles de muestra vida.
No puedo saver komo va ser el tyempo kuando el lektor va meldar estas linyas. Sielo oskuro? Fresko o azyendo luvya?...Ke importa?! Ansi ke ansi Junio esta detras la puerta otrun poko. No manka muncho para ampesar a kesharmos de las kalores. Es djusto el tyempo de profitar de estos diyas pasajeros. Antes de meter el punto final, kero azer una remarka.
Antes de mandar este teksto, komo syempre ize un kontrol de yerros probavles. Al lugar de yerros me rendi kuento de otra koza. Nunka tengo empleado tala muchidumbre de adjektivos en mis eskritas. Reelmente me enkanti, porke no tengo muncho manya de azer este karar de alavasyones. Deve ser de la egzaltasyon de la Primavera!!.
