Insertidumbre, sospecho i inkyetud

Klara PERAHYA Judeo-Espanyol
29 Mayıs 2013 Çarşamba

El mundo oksidental komo tambyen oriental, laiko i de mezmo relijyozo, se topa en este momente en un estado de intensa inkyetud provokada por una terrivle inkomprensyon de varyos faktos ineditos ke okuren desde un syerto tyempo..

Myerkoles de la semana pasada, en Londra, dos mansevos de kuero bruno (al pareser nasidos en el payis) mataron al nombre de Allah  un militaryo İnglez  ke no konosian, ni kon elkual  avian tenido el mas chiko  kontakto asta el momento ande desidiron en supito de kitarlo del mundo; eyos lo mataron  simplemente por matar,  se puede pensar tambyen porke la viktima era diferente de eyos.

El Shabat sigyente, en el baryo relativamente muevo de Paris nombrado ‘La Defense’, un soldado fransez fue (syempre al nombre de ‘Allah’) atakado sin ninguna razon i ferido al nivel del peskueso por un estranjero ke reusho a fuir.

Un mez antes, en Boston, dos otros mansevos izyeron eksplozar bombas frabrikadas por eyos mizmos, ke kavzaron la muerte de 3 jovenes i feryeron gravemente munchas otras personas kon las kualas eyos dos no tenian ninguna relasyon...

Lo mezmo fue el anyo pasado en Fransya en Toulouse, el horrivle krimen de dos militaryos fransezes de konfesyon muzulmana i de 5 djudyos, tres ninyos, un adolesente i un profesor de eskola...

En kaji la totalidad de kavzos, no se trata de aktos de revolta djustifikada o no djustifikada, ni de un kualkyer dezekilibro psishiko ande la mas parte del tyempo el matador (en un momente de doloroza lusididad) se da la muerte a si mizmo.

İgualmente, ninguna korelasyon kon las kondisyones sosyo-ekonomikas ande biven los autores de estos faktos kriminales,  ni de kualkyer otras kestyones de interes, selo, rankor o ravya , ma de desizyones personales sin razon ni objetivo definido, aktos ke puede ser mizmo no emanan direktamente de una de las grandes nebulozas terroristas de muestro tyempo, ma ke son  inspirados por un djenero de nihilizmo paradoksalmente relijyozo, ke (al nombre de tekstos sakros interpretados negativamente) konsidera la muerte komo una afirmasyon de vida.

Si...en este momento, en el mundo rasyonal oksidental komo oriental, todo parese ser “Insertidumbre” , “sospecho” i “inkyetud”.