A meldar la prensa franseza se puede pensar ke a syertos momentos el viaje de Sarkozy en Israel fue un real sukseso diplomatiko para Israel komo tambyen personalmente para el presedente Prezidente de Fransya, el kual (aunke vizivlemente leshos de todo modo de aksyon politika) goza aktualmente de una notoryedad mas o menos pozitiva serka de la masa elektoral de su payis ke parese kaji apresyar la oportunidad de las reformas ke el avia introduzido o prekonizado durante su mandato.
El fue realmente resivido muy kalorozamente en Tyerra Sante, ovasyonado partikularmente por la kaji totalidad de Israelyanos orijinaryos de Fransa; su vyejo litijyo kon Benyamin Netanyahu parese de mezmo aver sido solusyonado . En la sivdad de Natanya, el titolo de ‘’doktor honoris causa’’ le fue atribuido por su apoyo al Estado de Israel, su kontribusyon a la paz en el mundo i espesyalmente su lucha kontra kualkyer forma de antisemitizmo.
En repuesta, Sarkozy entusyazmo el oditoryo İsraelyano kon la kayentor de sus palavras: “Para mi, ay un mundo de antes la Shoah i un mundo de despues la Shoah, esto es una konviksyon ke syempre tuve en mi; ninguno (djudyo o no djudyo) tyene el derecho de kedar indiferente al destino de Israel i del puevlo djudyo. La Shoah izo de Israel i del puevlo djudyo, un puevlo universal… Desde la Shoah, el futuro de Israel devino por syempre ‘un sujeto ke konserna la humanidad entera.”
Palavras puede ser klasikas en semejantes sirkunstansyas ma ke yevan en sus tekstura (aun las nombrozas kritikas i objeksyones ke fueron pronunsyadas en el pasado) la kayentor de un real sentimyento de amistad, lo ke para muestro puevlo es oy en dia un presyozo apoyo.
