El korason mo lo azes byen klaro
Mi defunda madre, ke su alma repoze en paz, bivda a 27 anyos, kon dos kreaturas de laskualas eya era la sola responsavle, tenia el uzo (puede ser para engancharse a un sentimyento irreal de esperansa) de kantar kada prinsipyo de Mayo, el refrano fransez :“Mois de Mai, mois de Mai, tu nous rends le coeur bien gai...” ke kere aproksimativamente dezir: “Mez de Mayo, mez de Mayo, el korason mo lo azes byen klaro...” i yo munchas vezes me sorprendo oy en dia, repetando las mizmas palavras en varyas sirkunstansyas...
Es ke tendre la okazyon de azerlo este anyo? No lo se... A la eksepsyon de dia de Vyernes pasado el 10 Mayo 2013, kuando delantre el Kotel Maaravi, bozes de mujeres se realsaron verso el syelo, meskladas a bozes maskulinas, no veyo otra razon de alegria...
Vyernes pasado se enaltesyeron bozes de madres en la glorya de sus misyon de ser (komo mo lo dize la Biblia) las guardyanas de la Ley , bozes yenas en mizmo tyempo de kontentes i de anksyedad, de esta eternal inkyetud ke parese ser inherente al djudaizmo... bozes de paz i de amor komo tambyen bozes de luchaderas.
El kep sovre la kavesa, el Taled sovre los ombros, eyas vensyeron (grasyas a un muevo dekreto judisyal promulgado por el governo aktual) la rezistensya syega de sus ermanos enfohados en un hasidizmo eksesivo, los kualos no akseptan ninguna evolusyon sosyo-kultural ni niguna partisipasyon integral de la mujer a sus orasyones .
Desde kaji 30 anyos, en Israel (ke es konsiderado komo una de la mas grandes demokrasias del mundo) niguna boz de mujer era permetida en las orasyones delantre el Kotel , i es solo vyernes pasado, despues una grande lucha, ke muestras ermanas Israelyanas obtuvyeron el derecho de azerlo libremente, a boz alta, en este lugar konsiderado sakro . Eyas lo izyeron en perfekta konformidad kon la resyente desizyon governomental, i esto fue una viktorya de la Luz kontra la oskuridad.
Komo se asperava, uvo protestasyones vehementes de la parte de nombrozos haredim ke oy en dia (al risko mizmo de azer atrazar el enfloresimyento del djudaizmo) preferan kedar enganchados a tekstos arkaikos ke no son adekuados al konteksto sosyal de muestros dias.
Vyernes el 10 mayo 2013 para las militantes ke egzijaron la akseptasyon no solo de sus prezensya ma tambyen de sus boz en este lugar santo, no fue ‘el orgolyo de venser el adversaryo’ ke prevalyo, ma ‘la ermoza alegria de toparsen lado kon lado kon sus korelijyonaryos ombres komo mujeres, todos unidos en un mizmo momento de konsentrasyon relijyoza’.
A parte este dia luminozo malgrado la ravya de los ke protestaron, kualos son los otros eventos ke mos puedran alegrar en este mez de Mayo? Ke ay en muestro entorno?
Para los unos, gerras sanglantes, muerte i sufriensa no solo de adultos ma sovre todo de ninyos, loskualos serran sus ojos por syempre sin mizmo entender deke eyos vinyeron al mundo.
Para los otros: espanto, peligros permanentes i insertidumbre..Al Sud de la Turkia, tyerra de refujyo para multiples ninyos i mujeres siviles siryanos, munchos de estos desfortunados fueron trajikamente golpeados a muerte de parte de sus propyos ermanos siryanos, lo ke realmente es un drama inkomprensivle
En la Afrika, kombates insesantes entre etnias diferentes i en algunos lugares ainda ‘la ambrera’ .
En el Oriente Medyo, ‘odyo’ i ‘eternales amenazas’.
En la Evropa, una kriza ekonomika de dia en dia mas alarmante.
En los Estados Unidos, el dubyo i el sospecho desde el dia del atake terroristo de Boston..
Ay momentos ande mos demandamos kon o sin razon, si el mundo troko realmente desde los tyempos oskuros del empesijo de la Historya Humana?
Por seguro ke enormes progresos fueron gradualmente realizados ; deskuvyertas prodijyozas fueron echas , remedyos ekstraordinaryos fueron deskuvyertos para luchar kontra el frio, la dolor i los mikrobes ke paresian ser invensivles ... En matematika muevos teoremas fueron enunsyados, en filozofia teorias ineditas fueron desvelopadas , el arte enfloresyo...ma, eske la mentalidad del humano troko verdaderamente al mizmo nivel ke la syensya?
Si... leyes imperativas fueron promulgadas para erradikar el krimen i la indjustisya, ma ke fue el rezultado en munchos lugares del mundo?
