La semana pasada fue doloroza para Los Estados Unidos. En el espasyo de 4 o 5 dias, diferentes golpes firyeron el payis en su sensivilidad komo tambyen en sus karnes... ma no en su potensya echa simultaneamente de ‘progresos syentifikos’ , ‘desvelopamyento industrial’ i partikularmente ‘koraje siviko’.
“Una desgrasya no vyene nunka sola” dizen los fransezes... ansi fue para la mas grande potensya del mundo:
Lunes: fue el karnaje en Boston poko tyempo antes la klotura del tradisyonal Marathon ke kada anyo koinsida kon el Patriotik day. Este dia dedikado habitualmente al ‘esforso fiziko echo en una atmosfera de alegria i kontentes’ fue este anyo kloturado por 180 feridos i 3 muertos: Martin Richard aedado de 8 ans, Krystle Campbell de 29 anyos, i Lu Lingzi de 23 anyos, todos arrankados a la vida a la flor de la edad en una atmosfera de fyesta, por dos bombas artezanales echas no solo de un materyal eksplozivo ma tamby en de klavos, bilyas i varyas otras kozas kapavles de torturar i azer sufriir.
Komo se entyende byen, kaji immedyatamente despues la desgrasya, empeso una bushkida frenetika no solo de los kulpantes ma tambyen de los objetivos ke pudyeron motivar un akto a este grado krual.
Los autores del krimen fueron fasilmente identifikados grasyas a las chikas kameras elektronikas de kontrol ke se topan en varyos lugares de kada sivdad i los kulpantes immedyatamente persigidos en una korrida de un ritmo loko.
Durantes las primeras oras despues el triste akontesimyento, dos eventualidades se prezentavan al esprito: “Atako djihadisto de inspirasyon ajena” o byen “Akto kriminal del interyor mizmo del payis, de parte de algunos myembros ekstremistos del partido ultra nasyonalisto amerikano, el kual kedo irreversivlemente atado a konvinksyones arkaikas enteramente kadukas.
Martes: ‘Grande eksplozyon en una fabrika de ‘gübre’ en Teksas, ke kavzo la muerte de munchas personas i ke al empesijo provoko en el esprito de varyas personas una kestyon inkyetante: “Es ke ay una koneksyon kon el kavzo de Lunes?”
Myerkoles: Repuesta negativa del Senato Amerikano konsernando una kualkyer modifikasyon del kodigo sovre las armas, lo ke fue un golpe terrivle inflijido a la politika de Obama dirijida espesyalmente kontra esta antigua desizyon vyeja de 200 anyos ke aktualmente devino eksesivamente peligroza.
El mizmo dia fueron mandadas letras anonimas entosegadas al Prezidente i tambyen a unos kuantos senatores, de parte de un ekspeditor anonimo....No se konose el objetivo real de este akto empapado de una intisyon kriminal evidente, la kuala inevitavlemente krea una atmosfera de sospecho i de grande inkyetud.
Djuevez el dia: Durante la Seremonia eukumenika en omenaje a las viktimas del atentado de Lunes, Barack Obama disho kon una boz vigoroza aunke yena de emosyon. “Pedrimos puede ser por un momento muestro ekilibro, ma devemos de muevo tener la kavesa alta i ir asta la fin de muestros esforsos para topar los kulpantes” ... i el kontinuo kon la mizma vigor: “Mos keren deskorajar, ma no vamos abokar la kavesa, el anyo venidero a la mizma data el dia de los patriotos, el mizmo Marathon sera realizado”.
El Prezidente avlo en este senso aunke el sospecho i la dolor se avian abatido sovre el.
Djuevez la noche: Un adjente de la polisia lokal fue matado serka de la afamada Universidad MİT de Massachuset, situada a proksimidad de Boston... Desde el primer momento se establesyo el dubyo de una koneksyon kon la bushkida de los responsavles del karnaje de Lunes.
Vyernes verso la tadre: Anunsyo de la muerte del primer kulpante durante la persekusyon de la polisia i de la kaptura del segundo, topado gravemente ferido, eskondido en una guerta , adriento una embarkasyon , sovre avizo del proprietaryo del lugar ke telefono a las autoridades adekuadas immedyatamente despues su deskuvyerta.
Se trata de dos ermanos Chechenes Tamerlan i Djokhar Tsarnaev profundamente atados al İslamizmo, el uno aedado de 26 anyos el otro de 19 , emigrados en los Estados Unidos desde aproksimativamente 10 anyos, eskolarizados i edukados en sentros eskolaryos ekskluzivamente amerikanos, “el grande” poko komunikativo, fervente amator de boks ma enfohado en sus relasyones amigavles kon un ‘İmam’ konosido por sus konviksyones ekstremistas , “el chiko” por kontra muy avyerto i sosyavle , perfektamente adaptado a la vida amerikana i ekselente estudyante tal ke lo dize un gazetero del Boston Globe (diaryo el mas meldado en Massachuset) el kual fue el kompanyero de klasa del inkulpado .
İmmedyatamente despues su kaptura, gravemente ferido ,el chiko de los dos ermanos Djokhar Tsarnaev fue tramsportado al hospital para resivir los kudyos menesterozos afin de ser en estado de pueder responder a las varyas kestyones de la polisia.... sin ke esto lo salve de la grande probabilidad del “kastigo de muerte” ke (segun las leyes Amerikanas) le sera inflijido.
Barack Obama no manko de saludar kalorozamente el lavoro echo i los varyos servisyos de la polisia ke lo realizaron , ma el insistyo ke munchas kestyones kedan ainda sin repuesta.
Por ke motivo estos dos ermanos perpetraron este krimen? Eske uvo una influensa ajena o puedeser interna? Deke este akto fue perpetrado en Boston ke es la sivdad la mas intelektual de la Amerika en su totalidad i puede ser tambyen la manko politizada?Kestyones muy importantes ke manifestan la grande preokupasyon del Prezidente.
Es un fakto, ke en ke lugar del mundo ke sea, munchas preguntas (formuladas o no a boz alta) kedan pendientes en el ayre mizmo ke respiramos: Eske la mundyalizasyon fue una viktorya o una desfecha del humanizmo? Es ke egziste una chika esperansa ke un dia avra un enkontro armonyozo de ‘aspirasyones’ i ‘valores’ entre los puevlos atados kada uno a su propyo pasado i a sus propyos paradigmos? Es ke puedra aver entre las kriansas humanas la mizma vizyon del futuro?
P.S. (Martes 23 Abril). La primera deklarasyon de Djokhar Tsarnaev fue ke no uvo ninguna influensa ajena.
