El livro “Bir zamanlar Büyükada 1931-1961” eskrito en un estilo klaro komo la agua de un manadero ke ninguna angusya parese trublar i kon una grande sensivilidad perseptivle en kada paragrafo, fue para mi komo un retorno a munchos anyos antes i so konvensida ke sera lo mezmo para munchos de sus lektores...
Ke seyamos vyejos estivantes de la Grande Isla o no, Viktor Albukrek mos yeva leshos en el pasado, asta esta epoka de la vida ke (todo en syendo diferente para kada uno de entre mozotros porke echa de eventos disemblavles) keda syempre empapada de dulsor i aze arrebivir en muestra memorya rekuardos ke mos revelan verdades ke asta oy avian puedeser kedado mudas, eskondidas en el olvido ... Ansi, para munchos, este livro aze rebivir la vizyon del tyempo bendicho ke yamamos “la chikes”, ande todo semejava ser posivle i ande la revolta i la esperansa paresian kaminar en djunto ‘lado kon lado’ i mizmo envezes ‘mano en la mano’.
El autor mos avla de su ninyez, de sus propyos konjenitores i amigos i mizmo de sus kompanyeros de djugo, el mos aze presentir la mentalidad koryente de entonses i la atmosfera sosyal de la ‘Izla de Prinses’, ande su padre avia echo fraguar una kaza a la eskondida de su mujer refraktarya a un semejante proyekto por razones futiles. El mos da tambyen, entre las linyas de su livro, sin apoyarse sovre ningun fakto real, el estado de alma i la eternal anksyedad djudia echa de insertidumbre de lo ke sera el dia de ‘amanyana’.
En desparte de esto, el mos avla de la rikeza arkitektural del lugar i de los manyifikos ‘konakes en tavla’ kedados de la fin de la epoka otomana komo testigos tanjivles de la somptuozidad de akeos anyos. El mos ambeza tambyen ke en la epoka Bizantina esta grande İsla konsiderada oy komo uno de los mas luksyozos sityos de vilejyatura, vijitado desde largos anyos por miles i miles de turistos por su ernozura natural i la esplandor de sus sharas de pinos, era durante el imperyo Bizantino un lugar de egzilyo ande se embiava los ke eran konsiderados ‘indezeavles’ de la parte de los dirijentes.
De esta manera mos ambezimos ke al empesijo de la epoka Otomana, este paradizo aktual nombrado asta unas kuantas dekadas antes ‘Prinkipo’ era un lugar mas o menos modesto, puevlado prinsipalmente de ansyanos otoktones ortodokses , los kualos se okupavan de varyos ofisyos i lavoros en vista de asegurar la vida del lugar; lo mas de entre eyos eran peshkadores o vendedores de lugumbres gregos ke bivian aya enverano komo invyerno i ke gradualmente fueron remplasados por djente del payis.
Es sovre todo serka de la fin del imperyo Otomano ke esta izla empeso a desveloparse en su estilo de vida i devenir un lugar de vilejyatura idiliko, alavado por grandes poetas ke bushkavan aya la atmosfera de harmonia i ermozura propisya a sus inspirasyones i es poko a poko ke fueron fraguadas facha a la mar, sovre orden de los grandes senyores de la epoka, las rikas moradas yamadas ‘köshkes’ entornadas de esplendidas guertas.
En desparte de todos estos detalyos i de munchos otros, Viktor Albukrek mos avla tambyen de los ke konosyo en su chikes i ke por seguro desharon un ijo o una ija en muestra sosyedad aktual , los kualos toparan en esta ovra ‘trasas de sus antepasados’, syertos grandes o modestes komersantes, syertos importantes ombres de relijyon, arte o syensya, tal el prof.de muzika Moise Franko, el prof. Yatvart Margosyan , la profesora Alice Rozental ets... ets....
Ay en este livro komo una nostaljia intensa, kaji apasyonada, de un pasado kel eskritor no kere deshar dezapareser por syempre en las profunduras del ovlido, ay tambyen detalyos ke a primera vista pueden pareser futiles ma ke en realidad forman el teshido real de ‘muestra vida de kada dia’ i esto es muy importante.
Un grande pensador del kual (me ekskuzo) no me akodro el nombre, avia dicho ke ‘el Prezente es un poko echo del Pasado’ i ke ‘el Futuro lo sera del Prezente’.
Mersi Viktor de avermos dado estas pajinas ke mos pushan a tener envezes una mirada retroaktiva, todo en guadrando los ojos fiksos sovre ‘lo ke sera’.
