KOMEMORASYON de YOM HASHOA en la SİNAGOGA ASHKENAZ

Coya DELEVİ Judeo-Espanyol
10 Nisan 2013 Çarşamba

Alhad, 7 de Avril se organizo en la sovredicha Sinagoga una seremoniya de Komemorasyon kon la partisipasyon de diversas otoridades i un grande shifro de muestros korrelijyonaryos. Fue una tadrada de intensa emosyon. Muy probavle ke una de las amigas de esta pajina va eskrivir sovre el evento. Pensando ansi, preferi yo eskrivir en unas, kuantas linyas, una kurta jeneralidad sovre muestros amigos Ashkenaz i despues, kontinuar kon la İstoria de la Sinagoga.

Puedemos ampesar kon la sinyifikasyon del byervo “Ashkenaz”. Es un nombre sitando en jeneral, los djudios biviendo (en la Era Media) en las oriyas del Rio Ren al Oeste de la Alemanya. El byervo Ashkenaz pasa en la Tora komo syendo el nombre del uno de los ijos de  Gomer, ijo de Yafet (el propio ijo de Noah).(Bereshit 10:3).

La primera Sinagoga Ashkenaz en Estambol, en el anyo 1831 ampeso a dar sus servisyos en una kaza de Hendek Sokak. Es la unika ke se save, asta el 1866, anyo de su destruksyon en un fuego. Sigiendo esta desgrasya, en Yüksek Kaldırım, se ampeso a fraguar una Sinagoga en tavla, konosida komo “Osterreich  Temple”. Era egzaktamente en el mizmo lugar ande se topa oy, la Sinagoga aktuala.

Vinyendo a el anyo 1900… El Sultan Abdulhamit kito un “Ferman”, en el kual estava ekspresando la permisyon de fraguar una Sinagoga mueva en pyedras (kagir) al lugar de la de tavla, ke fue ansi ramplasada por una fragua mostroza. La Sinagoga mueva fue finansada en grande partida, por los djudios Austriakos i por el Sr. Herman Goldenberg, el tambien de raizes austriakas.

Antes de avansar en mi teksto, aki devo dizir ke syertos detalyos i otros ke van a segir ansi ke los ke konsernan los finansyeros, me fueron komunikados por Metin Delevi. El, desde un tyempo esta kontinuando a publikar en muestro periodiko Şalom, una seriya titolada “Osmanlı ve Modern Türkiye’de AŞKENAZ YAHUDİLERİ”. (Djudios Ashkenaz en la Turkiya Otomana i Moderna). Es un lavoro muy importante, fruto de largas i seriozas bushkidades.

Dunke, la mueva Sinagoga, teniendo la aparensya maestuoza de Katedrala Evropea, kosto aproksimativamente, 60.000 frankos a la epoka. Adjustaremos ke, el “Ehali la “Teva”, en arvol presyozo lavorado a mano por el artizano Fogel, fue el dono del Sr. Carl Carlmann, a la memorya de su espoza Rachel desparesida en el anyo 1904. Aki kero kontinuar kon syertos detalyos konsernando la fragua eya propia. Son detalyos bastante enteresantes ke no konosiya asta agora i ke esto sigura, munchos dentre mozotros no konosimos.

Ansi, en la Sinagoga kompuesta de 7 pisos, los dos etajes superyor son destinados para damas, en tal ke “Azara”. El piso de entrada es la seksyon ke forma la parte prinsipal de la Sinagoga. Abashando las eskaleras, en el primer piso del “bodrum” (mahzan), se topa un chiko “Midrash” i una piesa empleada komo kamareta de “Seuda”. El etaj de mas abasho era para los “Hahames i Hazanes” vijitadores. Enfin, los ultimos dos pisos inferyor del budrum eran destinados para las “levayas”. En este piso empleado komo “Morg”, se aziya los ultimos doveres de “Rehisa”…    

La inogurasyon de la Sinagoga se realizo Alhad, el 23 de Septembre  1900 kon las orasyones del Hazan “Valdovski” i el deskorso del “Sr. Adolph Rozenthal” en turko i en alman.Entre los ke asistyeron a este evento  memoravle se puede sitar el “Baron de Kaladji”, Gran Konsul reprezentando “Austria-Hungaria”.*