Myerkoles pasado la tadre, una baforada de humo blanko ke salyo de una de las chimeneas de la somptuoza Eglisya Sixtine del Vatikan, anunsyo al mundo Kristyano la nominasyon de un muevo Papa.
Eya era el sinyo ke los partisipantes del konklavo de kardinales reunidos por la sirkunstansya en una atmosfera de ovligo absoluto de diskresyon, ya avian eskojido el suksesor de Benediktus XVI.
Elijido despues nombrozas traktasyones i espesyalmente despues una larga i profunda refleksyon, el Prelate de Arjentina “Jorge Bergoglio (aunke poko konosido en la Evropa) fue anunsyado Pastor i Giador espiritual de milyones i milyones de mujeres i ombres.
Entre las multiples kualidades ke le son atribuidas: “su simplisidad”, “su humilidad” i su grande proksimidad kon todo modo de problema ke konserna la provedad, ansi ke lo prova su lucha insesante kontra la mizerya i el immenso abizmo de inegualidades ke oy en dia egziste entre las diferentes klasas sosyales del mundo.
Su kombate a este sujeto fue (desde su manseves) muy fuerte i syempre konstante. El nunka ezito en su payis de nasimyento a partajar la mizma morada kon los desdichados. Prelato relijyozo de Arjentina, el refuzo de bivir en la morada episkopal relativamente somptuoza i prefero un chiko apartamento de dos o tres kamaretas.
Ma ‘una nuve opaka’ vela la luminozida de su pasado. Una kestyon ke munchos komentadores politikos formulan kon ezitasyon i dubyo es ia sigyente: “Deke este ombre de alta valor moral, este relijyozo prinsipalmente dedikado al ayudo del ‘otro’, kedo kaji kayado durante la desgrasyada epoka de la diktatura en su payis entre l976 – 1983 ande 30.000 personas dezaparesyeron sin deshar ninguna trasa? Deke, entonses, el no protesto ni intervino kon fuersa?
En sus livro intitulado ‘El Jesuita’ Serge Rubin I Fransesca Ambrogett mos azen saver ke a esta kestyon, el grande Prelato respondyo “İze lo ke pudia azer aun mis flakas relasyones para intervenir mas vigorozamente en favor de las personas ke avian dezaparesido”.
De su parte, el Militante por los derechos humanos “Perez Esquivel”Premyo Nobel de la Paz, konfirmo klaramente, el, la absoluta pureza del pasado del grande Prelato Jorge Bergoglio nombrado aktualmente el “Papa François”.
