Este teksto es parte de mi seriya sovre la “Vida Profesyonal-Mundo del Lavoro”, ke ampesi antes unos, kuantos mezes. Mis artikolos jeneralmente tratan de diversas formasyones profesyonalas egzijadas en diferentes sektores i apuntan en mayoriya las difikultades de topar un empyego malgrado los altos estudyos nesesaryos para esto. Adjustare ke en preparando estos tekstos, me aprovecho komo lo uzo syempre, de mis observasyones, de lo ke oygo i meldo. Tambien de vez en kuando reushko a profitar de disertasyones en la T.V, ande se diskuta djustamente este sujeto tan importante para los mansevos ansi ke i para sus paryentes.
En uno de estos programes un orador disho una koza enteresante: “Los mansevos no deven absolutamente eskojer sus profesyon en raporto de lo ke ven en las seriyas (filmos) projetadas en el ekran..”. Mas o menos, estas fueron las palavras del espesyalisto. Un tyempo aviya la seriya del avokato “Petrocelli”, del “Komiser Colombo” i si no me yerro, una seriya titolada “Young Doctors”…Es ke uvo mansevos influensados de estos filmos i ke eskojyeron de estudyar la “Medikeriya” o el “Derecho” ??. No lo puedo saver. Antes de kontinuar kon este sujeto kero avrir una paranteza.
No esto muy sigura si el verbo “eskojer” su karyera, ke emplei en el titolo del teksto es muy djusto. Porke, kon el sistema de egzamenes antes de entrar a la Universita, todos los mansevos no estan reushendo a sus eskopos. Esto es una facha del problema. Tambien, ser posesor de una diploma de Universita, konoser minimum una lingua ajena, todo en syendo un grande avantaj, no esta syempre efikache enfrente el grande shifro de kandidatos o otros obstakolos.
Vinyendo a los filmos o seriyas ke estamos vyendo en la T.V…La persona no se esta pudyendo impedir de pozarse esta kestyon: “Es ke estos filmos reflektan la pura realidad? o en ke mezura la reflektan?...” Bazandome sovre mis observasyones i eksperyensas personal, mi repuesta es negativa. Djusto en este momento me akodri aver meldado un artikolo kaji semejante, ande el eskrivano (o eskrivana) demandava mas o menos la mizma kestyon a un grupo de doktores. Aki va mirar de relatar los propozitos ke me kedaron en mi memorya. Asigun los profesyonales, en el ekran se esta vyendo egzajerasyon i mizmo una deformasyon de esta karyera bastante difisil. Puedo dar unos, kuantos egzempyos.
Asigun los doktores operadores:“ Myentres las oras de lavoro mozotros los “shirurjienes”, deshad tomar un café en la kafeteria, no tenemos afilu ni tyempo de komer. Afita muy frekuente, kavzos ke mos ovligan a kedar en el ospital oras i oras. Mos enteresamos unikamente al estado del pasyente, a sus dezrepozos, sintimos sus keshas.
“En el ekran estamos vyendo los doktores i sus asistyentes, enteresandosen de serka a la vida privada o sosyal del hazino. Naturalmente si ay un raporto kon el dezrepozo, en una mezura puedemos demandar kestyones simplemente de manera profesyonal. Estamos tambien vyendo en el ekran, grupos de asistyentes dando tornos en los koridores del ospital. Esto no es un tablo verdadero.No lo puedesh ver en la vida reel…”
Keridos lektores me kero akodrar ke en akel artikolo ke meldi se estava tratando de la seksyon “Urjensia”. Los profesyonales ke avlaron estavan kritikando los kargados de la sovredicha seksyon. Eran kritikas sovre la panik ke estavan azyendo a kada arivo de una ambulansa traendo un firido o un hazino. Asigun los profesyonales:
“Los doktores no deven azer panik enfrente de kavzos de urjensia. Ma, en el ekran estamos vyendo munchas vezes, unos, kuantos doktores koryendo kon una panik egzajerada para arresivir la ambulansa. En realidad, en esta seksyon tenemos una “organizasyon perfekta”. No ay doktores koryendo kon asigo o panik”…
Keridos lektores, me parese ke devo kortar aki. Porke, si kontuneo ansi, mi teksto va trokar de objektivo i se va azer un artikolo sovre los doktores i ospitales!! Espero toparmos en serka para arresivir Pesah…
