Komo ya lo tengo dicho i una otra vez, me avia prometido de mi para mi de nos eskrivir mas nunka al sujeto de Dominique Strauss Kahn, afin de no pedrer el karinyo de mis amigos ke pensan otramente ke mi. Ma (me ekskuzo) no parvengo syempre a ser fidel a mi palavra… Es mas fuerte ke mi, syento munchas vezes ke kedar kayada es,en algunas sirkunstansyas, komo un djenero de traisyon enverso mi propya konsyensya.
Desde un maldicho dia de Shabat o Alhad del anyo 2011, en New-York, fue una persiga sin fin ni piadad, kontra este ombre ke en el espasyo de unas kuantas oras (sin aver sido djuzgado ni mizmo oyido) fue tratado komo un vulgar kriminal, manos atadas detras la espalda, arrondjado de una manera odyoza de las alturas ande se topava asta el fundo de un abizmo de deshonor inimajinavle.
Liberado unos kuantos dias mas tadre, despues de una seryoza enkuesta, el fue enfin afrankado antes de tornar a su payis ande lo asperavan tambyen otras keshas por faktos vyejos de 7 o 8 anyos, prosesos ke asta oy en dia no ayegaron a ningun verdikto de kulpabilidad…
Uvo un momento de eskanso. Ma ay de esto dos o tres semanas, muevo kavzo de despresyo: Fue anunsyado en Fransya la publikasyon de un livro titolado “La Belle et la Bete”, eskrito por una intelektual orijinarya de Argentina, nombrada Marcela Iacub, livro ande la autora sin verguensa asemeja el ex-prezidente del I.M.F. a un puerko...Si, a un puerko.
Afin de realizar su ovra de la manera la mas sensasyonal posivle, eya no ezito a emplear medyos realmente inyovles. Editoryalista en una grande gazeta franseza, la eskritora aparejo voluntaryamente, de sangre fria, ‘okazyones de enkontro’ kon Strauss Kahn en publikando artikolos favoravles a su sujeto, i desde las primeras entrevistas le izo sentir ke le plazeria tener una aventura namoroza kon el, todo en guadrando sekreto su objetivo real ke era solamente de observar i anotar (para publikarlos en su maldicho livro) los djestos i palavras ke el puedria tener i pronusyar en momentos de ekstazis seksual.
Akto abjekto de una basheza inimajinavle, perpetrado en el solo eskopo de ayegar a la selebridad literarya en inflijando un ultimo golpe a un ombre ke, doz anyos antes, ya fue ferido a muerte en su dinyidad por motivos semejantes.
‘Las primeras reaksyones de unos kuantos editoryalistos’ fueron malorozamente relativamente elojyozas, pretendyendo ke se trata de una afirmasyon de “la libertad de ekspresyon” akordada a los eskritores komo tambyen a la Prensa, sin tomar en konsiderasyon ke kada individuo, en su intimidad, tyene el tambyen el derecho a la libertad de sus aktos i djestos tanto ke eyos no son prejudisyavles a otras personas.
En el buto probablemente de aktivar su vendida, pajinas del dicho livro fueron mizmo publikadas en seryozos diaryos i hebdomadaryos, antes mizmo ke el pareska publikamente.
Ma poko despues otros eskritores de grandes gazetas i revistas komo ‘’Le Point’’, ‘’Le Figaro’’, ‘’Le Monde’’ ets… realsaron la boz para esta vez kritikar kon grande severidad la ovra en kestyon, su sujeto, su estilo, su vokabularyo i prinsipalmente su falta de eskrupulo moral.
Tambyen, una aksyon judisyal fue avyerta de la parte de los avokatos de Strauss Kahn para protestar kontra Marcela Iacub i las gazetas ke publikaron ojas del livro, proseso ke resivyo en poko tyempo una konklusyon favoravle al ex prezidente del IMF.
Konsejo personalmente a mis amigos frankofones de meldar a este sujeto los ermozos i fuertes editoryales de Bernard Henri Levy, Tesson, Claire Gallois ets… ke penso puedran topar en el sityo elektroniko Wikipedia,
El kavzo Dominique Strauss Kahn keda syempre para mi un djenero de ‘Enigma Humana’, prinsipalmente en las otomatikas reaksyones indjustamente negativas a su sujeto.
Deke esta inkansavle sanya kontra una persona de una intelijensya superyor? Deke este aborresimyento sin fin ni atemo por un ombre ke rendyo grandes servisyos en el espasyo ekonomiko, kulpavle puedeser de un ekseso seksual inkontrolavle? El nos trahiso ni danyo el interes de ninguno, al kontraryo , durante las varyas kargas ke le fueron konfiadas, el izo todo su posivle afin de kumplirlas de una manera optima…El onoro su payis durante su mandato de prezidente del I.M.F. en realsando i humanizando esta İnstitusyon Internasyonal , asta mizmo grasyas a su buena jestyon, ayudar a salvar de la ambrera munchos payizes afrikanos.
