Me akodro, en mi chikes, kuando se demandava a una ninya lo ke kere azerse en engrandesyendo, eya respondiya: “Yo me vo azer novya!”. Oy, en preguntando lo mizmo, kualo responde una adolesente?... Munchas kozas, ma entre eyas muy probavle no va dezir ser “unikamente” novya i madre. Las muchachas keren ser tambien, mujeres teniendo kriaturas i karyera. Muy natural. Es sus derechos.
Kualos son esto derechos de la Mujer, ke se avlan tanto kada 8 del Marso? En prinsipyo, son los derechos ke le asiguran en todo domeno de la vida komun, igualidad kon el Ombre... En los domenos sosyal, ekonomik, politik ets... Son derechos fundamentales achetados por organizasyones internasyonalas komo la ONU (Nasyones Unidas), İ.L.O (Organizasyon İnternasyonala del Lavoro) ets.. La Deklarasyon Universal de los Derechos del Ombre es tambien un dokumento ke asigura la proteksyon de estos derechos.
El prinsipyo, la igualidad fue syempre al orden del diya en las demokrasias del Oksidente. Portanto, en estos paises, las mujeres dyeron una grande lucha para pueder obtener el derecho de elijir. El mas importante dokumento rezultando de esta lucha, fue el “Akordo sovre los Derechos Politikos de la Mujer”, achetado en la O.N.U i entrado en vigor el 7 Julio 1954. Aki en Turkiya, desde el 1934, ya se aviya konosido a las mujeres el derecho de votar i ser elijidas. En la eleksyon del 1935 eyas uzaron este derecho. Malorozamente, en diversas periodas, solamente un chiko shifro de mujeres reusho a entrar al Parlamento. Puedemos dezir ke por la ora, eyas no se entegraron kompletamente a la Politika...
Organizasyones komo “El Movimiento de la Libertad de la Mujer” lucharon para obtener los mizmos derechos sosyal de los ombres, la libertad de instruksyon, de lavorar, de eskojer su karyera i su manera de bivir, entre otros derechos. En syertos derredores estas organizasyones provokaron reaksyones negativas, de sorte ke el movimiento kamino muy avagar. Finalmente. La O.N.U deklaro el anyo 1975, komo “Anyo Universal de la Mujer”.
Teorikamente la igualidad parese egzistir... Ma, en la pratika!?.. Malgrado los anyos i las luchas ke dyeron las mujeres, kuantas reusheron a obtener sus derechos?... Por siguro munchas, ma no todas. No kero ser konsiderada komo pesimista, ma devo dezir ke oy no puedemos pretender un radikal o grande amijoreamiento en este domeno.
En realidad es un sujeto bastante ondo, ke yo no me syento enteramente kapache (kompetente) de analizar. Solamente me esto kontentando de ekspozar mis opinyones, bazandome sovre los rezultados de las enkuestas amostrando ke en syertos paises o syertas komunidades, uvo muy chiko trokamiento, (por no dezir “nulo”) en la situasyon de las mujeres. Se trata por lo mas, de presyones tradisyonal o relijyozas, diversos uzos ets... ke konstituan seryozos obstakolos delantre la emansipasyon i libertad de estas mujeres.
Avlaremos un poko de la Madre Djudia Sefaradi (mas o menos tradisyonalista). Eya syempre fue el pilar de la famiya, logro para konservar las tradisyones relijyozas, folklorikas. Grasyas a eya, mizmo si no semos muy nombrozos, oy estamos pudyendo avlar, eskrivir en Judeo-Espanyol... Azyendo esforsos para no deshar olvidar la Kultura Sefarad. Puede ser, aktualmente se diskute ke grado la Madre Djudia esta kontinuando su misyon de “Transmisyon” de muestra İdioma i Kultura.
Es un sujeto ke merese konsiderasyon. Par konsekuensa, no me esto sintyendo el “Derecho!” de ekspozar mi idea de una manera unilateral. Prefereriya un interkambiyo de opinyones. Mis propozitos no deven ser konsiderados komo kritika. Es simplemente una konstatasyon. A la kontra, ser testigos de la evolusyon, de la emansipasyon de muestras ijas, inyetas (futuras madres), mos glorifika. Tyenen la libertad i el “Derecho” de azer altos estudyos para aparejarsen una karyera.
Estamos vyendo las mujeres kaji en todos los domenos profesyonal. Mizmo si syertos lavoros estan dayinda en el monopolyo de los ombres. Esto avlando aki, de una jeneralidad, i no solo de la Mujer Djudia. Por terminar devo dezir ke no se puede enyegar la grande evolusyon ke kumplieron las mujeres en el korso de los anyos. Mizmo si semos en minoridad por la ora. Eyas estan en la Administrasyon, Ekonomiya, Politika, en la Media ets... Estan azyendo altos estudyos en la Medikeriya, Derecho, Sensyas ets... Este tablo pozitivo mos da grande plazer, orgolyo i esperansa para el avenir.
