ARRESIVYENDO la FYESTA de PURİM -1

Coya DELEVİ Judeo-Espanyol 0 yorum
13 Şubat 2013 Çarşamba

Adar es el 6. mez de la kreasyon del mundo, a partir de Rosh-Hashana. Komo la mayoriya de nombres de mezes en ebreo, tiene  un orijen Babilonyano ke sinyifika “granero”. Los kampos se aparejan a la sembradura. Adar syendo el ultimo mez de invyerno es oskuro, enuvlado. Portanto, nuves i eskuridad no es  impedimiento para la alegriya del mez. En Adar munchas maraviyas se kumplieron para el Puevlo Djudio. El miraklo de Purim es uno de estos.

Se esta aserkando Purim, el Taanit de Ester ke es siman importante de esta fyesta. Avlaremos un poko sovre los “Ayunos” en jeneral, de sus eskopos. En el Kalendaryo Ebraiko ay diversos diyas de taanit. Ke pueden ser sus razones o sus eskopos?. Puedemos arrekojerlos en en tres kategoriyas: 1)-Arrepentimiento  2)-Rekuesta 3)-Komemorasyon. Tres prinsipal eskopos del ayuno. Si kada taanit los inkluye, por siguro uno de estos eskopos deve tener mas primura.

Oganyo, ampesando kon el Taanit Ester en el 11 de Adar (21 Febrero 2013), estamos selebrando la fyesta en el 14 de Adar (24 Febrero) i el Purim Shushan en el 15 de Adar. Shushan era la Kapitala del İmperio Persano: “…Andad arrekojer todos los djudios de Shushan, azed taanit vozotros por mi. Yo i mis donzeyas azeremos taanit de mizmo…” (Ester 4-16).

La Estorya de Ester ke todos konosemos muy bien, mos ensenya un milagro. Kada anyo repetarlo, estudyar tambien los livros de la Tora, mos ambeza la İstoria de muestro Puevlo, ken semos, de ande vinimos, ande vamos. Esto, par konsekuensa mos yeva a akodrarmos de muestras raizes, muestra lingua, muestras tradisyones i el dover de nunka olvidarlas.

En diversas epokas de la İstoria, en diferentes paizes del globo, los djudios fueron persekutidos. Munchas vezes fueron akuzados de no ser Fidel (leal) al estado ande biviyan. Kuala era la razon de estas persekusyones? Deke los djudios fueron akuzados? La kavza, la razon era sus grande atamiento a sus raizes, a sus Fey i Tradisyones.

Avlando de tradisyon…Yo por egzempyo syempre tengo en mi memorya las Fyestas de Purim de mi chikes, mi manseves. Me akodro, mi Nono (de b.m) kitava del almaryo la “Megila de Ester”. El rulo ya teniya su kuti orijinal de karton. Ma, mi Nona Djoya (de b.m) lo tapava i kon un kare de “atlas” teniendo una broderiya otomana manyifika. En este kare tambien ay la data 1312  brodada. No esto sigura a ke anyo korresponde.

Este kare de atlas es para mi uno de los simbolos del Purim i en kada Purim lo espando sovre la meza. Komo lo dishe, es un simbolo egzaktamente komo la Megila, el Taanit, las dulsuryas, los folares i mavlachas, los platikos i naturalmente el “harçlik” el “purimlik” ke mos davan los grandes despues de bezarles la mano.

Se aziya modos i maneras de dulsuryas, de biskochos ets… Mi Nona aziya en kaza afilu el “masapan” ke lo nombrava “almendrada”. No kero dizir ke no se esta azyendo oy tambien. Ma, agora devemos achetar no es lo de antes. Komo mos metiyamos a la sira para bezar las manos de los grandes i tomar el “purimlik”!! No abastava tanto dulse ke komiyamos en kaza, mos ivamos a merkar “mavlachas” del “Shekerdji Belifante. Ke diyas eran!!

Akodrarme de akeyos anyos de mi chikes seriya una nostaljiya, un eskarinyo??... En la mezura del posivle estamos kontinuando muestras tradisyones. Portanto devo achetar ke no es lo mizmo de antes 60 o 70 anyos. El modo de vida troko ansi ke el entorno, vizinos i otras kozas. En todo kavzo, espero ke nada no mos va impedir de kontinuar muestra tradisyon de Purim i otras fyestas, komo lo izimos syempre.

La semana ke viene, espero prezentar a los keridos lektores un teksto enteresante sovre Ester, par konsekuensa sovre Purim.

A kontinuar...    

1 Yorum