Puedesh estar siguros keridos lektores, azer un artikolo sovre Astérix, es (o era!) para mi koza ke nunka pensariya afilu en el esfuenyo! Porke, asta antes un mez yo era muy leshos del sujeto, por no dizir (de verguensa!) kompletamente inyorente. Naturalmente en mi chiko “bagaje” de Kultura Jeneral, ay el nombre de Astérix i de Goscinny. Ma, devo adjustar ke si par aksidente! unas, dos vezes enkontri en la T.V el filmo mizmo, troki el kanal.
En rezume, no sinti un entereso partikolar a este sujeto. Pekado atorgado. Muy probavle kuando ampeso esta seriya presipyos de los 60, yo ya aviya pasado la edad de meldar revistas de “bandas desinadas”. Portanto ya se ke mi ijo meldava esto i tambien “Red Kit” (Lucky Luke) del mizmo autor.
Fue muestra kerida Karen Şarhon ke me propozo de azer para “El Amaneser” el treslado de syertos pasajes de un teksto sovre el 50. aniversaryo de la konsepsyon de Astérix. Komo lo uzo syempre, ize unas, dos bushkidades suplementaryas sovre el sujeto para azer ansi un dosye mas kompleto. El treslado no fue muy difisil. El problema ampeso kon los indisyos konfirmando la teza de un Astérix 100% Djudyo!.
Sin konviksyon, komo se puede dar a entender al lektor una koza ke tu mizmo no konoses? No teniya dinguna idea sovre los sovredichos indisyos. No los teniya nunka visto. Fue uno de akeyos momentos de regreto, de “si saviya, keshki ke me entresara a Astérix!…ets..”. Par eksperyensa se muy bien ke los “keshkis” nunka solvyeron los problemas…
En turko ay un refrane ke dize: “Kul sıkışmayınca Hızır yetişmezmiş”... Simple traduksyon: (es en apreto ke el “Hizir” akude el ombre). Keridos amigos, es ke kreesh al azardo? Djusto akel momento de keshkis i regretos, mi ijo me bushko par telefon. Era el 1 Enero, konje. Sin afilu un buenos diyas, me apresuro de ir avrir el kanal 1 de la TRT.
Lo ke ize de vista. En el ekran una figura inkreivle, Obélix, o Gerard Depardieu si preferash!! Estava djugando el filmo titolado “Astérix i Obélix kontra Sezar”. Deshi todo i me asenti kon grande “ahadud” i kuryozidad enfrente el ekran. İ poko a poko entri al korason del sujeto i pude topar si no todos, a lo menos syertos pedasos del “puzzle” ke me mankavan.
Por egzempyo, el kepi metalik ke vistiyan asemejando a la Kippa…La chika Komunidad enfrente de la grande Armada de Sézar… Vensyendo esta fuersa grasyas al beveraje majiko (potion magique en el teksto) … El Rabino preparando este beveraje… El kazal komparado a un Kibbutz…Obélix kon las buklas o kokas ets… Ansi agora puedo dizir ke no tresladi a la “papasyega” akel pasaje.
Aki unos, kuantos detalyos sovre Goscinny ke konosimos mas muncho kon su “İdentitad Djudia” en el teksto de “El Amaneser”. René Goscinny, (4 Agosto 1926 Paris- 5 Novembre 1977 Paris), eskrivano fransez, famozo kon la seriya de “Bandes Déssinées” Astérix, Lucky Luke ets.. Se engrandesyo, estudyo en Buenos Aires i lavoro en New York sovre livros para los chikos. Tornando a Paris, presipyos de los 50, paso a la kavesa de una ajensya de prensa. Poko despues lo estamos vyendo entre los eskrivanos de “Lucky Luke” (Red Kit), kreado por “Morris” (Maurice de Bavere). Su enkontro kon el karikaturisto-desinator Albert Uderzo en 1957 fue un punto importante en su karyera.
Krearon endjuntos seriyas de “bandas desinadas” komo “Benjamin et Benjamin” ke konosyo un sukseso limitado i un anyo despues “Oumpah-Pah le Peau-Rouge” mas reushido. En 1959 Goscinny esta entre los fondadores de la Revista “Pilote”. Aki, djuntos kon Uderzo ampesaron los aparejos de “Astérix”. Esta seriya kontando las aventuras de un kazalino de la Galia, myentres la invazyon de las armadas de Sezar, konosyo un grande sukseso.
Esto koensida kon la epoka de Charles de Gaulle komo Prezidente de la Republika. Goscinny i Uderzo alkansaron a una grande fama kon la seriya reflektando tambien la atmosfera politik de akeyos diyas. Goscinny, todo en eskrivyendo los tekstos de diversos lavoros de “bandes déssinées” fransezas, okupo tambien el posto de direktor de una sosyedad de publikasyon. En 1967 fue onorado por André Malraux Ministro de Kultura akeya epoka, komo “Chevalier des Arts et des Lettres”.
