EL FUTURO GOVERNO ISRAELYANO EN FORMASYON

Klara PERAHYA Judeo-Espanyol
6 Şubat 2013 Çarşamba

Es ke los partidos relijyozos azeran parte del muevo governo Israelyano? Esta pregunta es una de las  ke formularon en data del 29/1/2013, tres djornalistos ‘Gil Hoffman’, ‘Lahav Harkov’ i ‘Myrian Kalfon’ de la edisyon elektronika franseza del Jerusalem Post, eyos dizen tambyen: “muy difisil de ver klaro”.

El rezultado de la votasyon del 22 Enero ya permete la formasyon de una koalisyon sin la prezensya de los partidos Ultra-Ortodoksos. Ma, Binyamin Natanyahu (Likud/ Israël Beiteinu,) dezea una koalisyon ke tendra a lo menos 80 deputados, lo ke asegurara una grande estabilidad al futuro governo, razon por la kuala el no kere renunsyar a su aliansa kon el “Shas” ansi ke kon “Judaizmo Unifikado de la Torah” .

Yair Lapid  de su parte, insiste sovre el ovligo del servisyo militar para los haredim ke refuzan no solo el servisyo en la armada , ma tambyen kualkyer lavoro sivil otro ke el estudyo de tekstos relijyozos, sujeto ke  fue uno de los temas mayores de su kampanya elektoral.

A muestro torno, a la kayades, mos demandamos deke este refuzo paradoksal de la parte de algunos haredim de kumplir kualkyer lavoro mizmo en el espasyo sivil? Deke refuzar de lavorar komo lo azen todos los sitizanos afin de asegurar el mantenimyento de sus famiya i no ser a la karga del budjeto governomental?

El lavoro no arrebasha ninguna persona ni yeva en el un kualkyer elemento negativo o agresivo. El fue prekonizado por la Biblia eya mizma.

Es a la sudor de tu frente ke komeras tu pan” disho el Dyo Baruhu  al ombre despues ke adam  komyo el fruto prohibido del arvole de la Konosensya (Bereshit 3/19).... La konosensya implika la responsabilidad, i es esto ke desferensya las kriansas humanas de las bestyales.  

Todo komo el estudyo, “el lavoro para asegurar su pan kotidyano’ realsa tambyen la grandor de la kriansa pensante en su esforso de no ser una karga par los otros. Esto munchos haredim no lo keren entender.

“Lavoraras los 6 dias de la semana ma el setyen lo konsakraras a la orasyon i a la meditasyon  i ansi sera tambyen para tus ijos tus servidores i esklavos porke i eyos tyenen menester de repozarsen”. Este orden del repozo absoluto del Shabat para todos, ke konstitue una de las primeras leyes sosyales de muestro tyempo, yeva tambyen implisitamente en el, el ovligo de lavorar los primeros 6 dias.

El lavoro es un akto de respekto enverso si mizmo komo tambyen  enverso los otros, el es una partisipasyon al esforso kolektivo solo kapable de asegurar la solidaridad entre los humanos... Kuando meldamos en muestros livros santos “Ama tu proksimo komo ti mizmo”,  ke mos keren dezir los savyos? Penso ke es: “respekta tu semblable, ken ke sea”.  

Ansi, para multiples otros relijyozos, el ‘akto de lavoro’ es munchas vezes el korolaryo de la orasyon. Avram muestro  padre  interrumpyo su meditasyon relijyoza kuando vido venir los tres viajadores afin de traer agua kayente para lavarles el mizmo los pyezes kansos, aun ke  el no savia ainda ke eran 3 andjelos. En este kavzo, a mi pareser, el kumplio un lavoro de solidaridad ke el konsidero komo un  dever sakro.

Komo ya fue munchas vezes eskrito en esta pajina, el profeta Esai mos dize por la Boka del ‘Bendicho sea su Nombre’: “el akto de ayuno ke a mi me plaze  es de romper las kavenas de la indjustisya, de liberar todos los ke son oprimidos...i tambyen de partajar tu pan kon el ke tyene ambre...”. Es verdad ke  partajar su pan es sublime, ma  este pan kale lavorar para obtenerlo...