Estavamos diskutiendo kon una amiga de los malores ke ay en el mundo. Eya estava analizando todos los evenementos ke se pasan de un angolo muy sombre i pessimisto. Yo no estava kompletamente de akordo. Me disho “tu sos optimista, no te deranja los males ke se pasan en el mundo, te das repozo a la alma”. Resivi un shok i no le respondi.
Eya pensava, komo munchos, ke el optimismo es un sentimiento naivo i egoisto. Para mi, al kontrario, el optimismo es un sentimiento ke konduze a la aksion, ayuda a esperar i a krear.
No puedemos trokar nuestro pasado, ma en siendo optimistos, puedemos tener mas muncha enerjia i una emosyon pozitiva para ermozear nuestra vida i la de todos los ke tenemos en el rededor. Es un arte de reushir enjuntos.
El mundo, kon todas sus novedades, es konstruido por los optimistos. Por el ke pensa ke todo se puede realizar en esta vida.
El optimismo i la esperanza kaminan en juntos i asi tenemos la fuersa de kontinuar, sin mirar atras. Este mundo apartyene a todos, no mos desharemos kaer en la trampa (tuzak) del pesimismo, el kual va enjuntos kon la passividad i asi al desgusto de la vida.
Shimon Peres dize “Optimistos i pesimistos mueren de la misma manera, ma solo biven de una manera diferente”.
