Alhad pasado el 27 del mez de Enero, dia mundyalmente rekonosido komo “dia del Holokosto”, dia ande se komemora, en la emosyon i la amargura, el rekuerdo dolorozo de la Shoa, krimen horrivle ke kedara syempre komo una mancha indelebile sovre la konsyensya i la Dinyidad humana.
Este anyo, la triste seremonia de rekuerdo tuvo lugar en la Sinagoga Etz Ahayim de Ortaköy en un ambiente de profundo respekto i de grande tristeza
Eran prezentes: el Embashador Ertan Tezgör reprezentante del Ministeryo del Eksteryor, el Patrik Grego Bartholomeos, el sinyor Yusuf Basmacıoğlu al nombre de la Eglisa Katolika, el sinyor Kevork Kazumyan ke reprezento la Komunidad Ermenia ansi ke nombrozos otros prezidentes i myembros de varyas İnstitusyones komuniteryas i karitativas djudias komo tambyen notavles i yahidim de muestra Kolektividad.
El rekuerdo de los “6 milyones de muestros ermanos salvajemente eksterminados” kedara syempre gravado en la memorya djudia i mizmo universal. Nunka, la Humanidad puedra olvidarse sus martiryo.
Ke sus almas repozen en paz.
