En este teksto vamos a meldar el estranyo “azardo ke salvo Auschwitz”, relatado por Anatoly Pavlovich Shapiro. El era el komandante del grupo aparteniendo al 97.rejimento de la 6O. Armada Sovietika. Pavlovich es un djudio ruso ke en el anyo 1941 entro a la Armada Rusa i partisipo par konsekuensa, a la 2. Gerra Mundial. Ansi, komo disho el , fue un azardo ke los izo dirijir verso el Kampo de la Muerte.
“..En el plano estava previsto un atako jeneral por el 12 Enero 1945. Kaji a la unanimidad estavamos pensando ke este iva ser el ultimo atako. Portanto, la rezistensya de la 17. Armada Alemana mos detuvo de adelantar komo lo aviyamos previsto. Myentres estos kombates, en el 24 (o puede ser el 25) Enero, los soldados miyos apanyaron un grupo de “siviles” armados.
“Los supsonimos de ser ajanes, espiones del enemigo. Se tomo la desizyon ke deviyan ser “fuziyados”. No me akodro komo fue, poko antes de los aparejos por la “fuziyada” sinti estos siviles avlando entre eyos, en Yiddish, lingua ke yo tambien konosko. Me aserki i uno de eyos me interpelo en gritando:”Ya Franzouzki Partizan”..(yo so un fransez de la Rezistensya). Sovre estas palavras, dechidi de interrojar el grupo apanyado.
“De esta manera me ambezi ke estos siviles aviyan reushido a fuyir de un kampo de konsentrasyon. Yo, mas antes ya aviya sintido el nombre de “Majdanek” ande aviyan matado muncha djente. Ma, lo ke no saviyamos era ke estavamos muy serka de Auschwitz. Portanto, este lugar, este Kampo de la muerte no estava sitado en muestro plano de atako!.”
Raphael Feigelson, el mas mansevo del grupo de partizanos, konvensyo Pavlovich a atakar este Kampo ande asigun el, 3.000 personas estavan muy probavlemente dayinda en vida. En desparte de esto, Raphael disho ke tambien un grupo de la Gestapo aviya kedado en el Kampo para efasar, azer despareser kompletamente las trasas, los testigos de la salvajeriya ke se bivyo en Aushwitz. Sovre esto, Anatoly Pavlovich rendyendose kuento de la seriozidad de la situasyon, troko el kamino dezinyado en el plano i desido de dirijirse verso Auschwitz. Giados por Raphael Feigelson, atakaron el Kampo. Enfrente de este atako “sorpreza”, los SS no pudyeron rezistir largo tyempo.
“Si no aviyamos enkontrado “Franzouski Partizan”, esto siguro ke el Kampo de Auschwitz iva ser desparesido de las ojas de la Istoria djuntos todos los ke bivyeron ayi, los dokumentos i testigos ke konteniya… Este kampo iva ser transformado en un ordinaryo kampo de kazaliko..” dize Pavlovich i kontinua:
“Avizi el “Estado Major”sovre el evento. Me felisitaron al nombre del “Mareshal Koniev”por la inisyativa ke aviya tomado, todo en dandome el orden de retornar a mi misyon prevista. Grasyas al ayudo de Feigelson, despues de aver reushido a desbarasar! el Kampo de los SS, torni a mi prinsipal misyon.
Aki eskapa el relato de Pavlovich. Konoseremos tambien Raphael Feigelson en kurto. Los SS aviyan desidado de likidar el Kampo de Auschwitz i ampesar el “kamino de la muerte”. Simualtaneamente el grupo de Raphael sintyeron rumores dizyendo ke de un momento al otro se estava asperando un atako de la parte de la “Rezistensya Poloneza”. Portanto, nunka tuvyeron la shans de vinir. Malorozamente, al lugar de eyos, arrivo un “SS Sonderkommando” kon la misyon de alimpyar, azer despareser todas las trasas de sus krimenes salvajes i deshar detras, un ordinaryo, simple kampo.
La demanyana del 21 Enero, un chiko grupo de detenidos reusho a fuyir a traverso los “barbeles” ke pudyeron kortar i a kualos entonses no se estava dando koryente elektrik. Raphael Feigelson estava entre los ke fuyeron, kon vestimyentas arrovadas del depo del Kampo ansi ke armas alemanas. Despues de aver kaminado un largo tyempo kedaron djusto en medyo de las batalyas. No paso muncho kayeron en las manos de los Sovietikos.
Ansi ke lo relatimos mas ariva, el komandante Pavlovich, el mizmo djudio, le demando a Feigelson en Yiddish “Du bist yid?” (sosh djudios?). Raphael le konto todo lo ke aviya bivido i visto en Auschwitz. Un verdadero azardo ke izo del 27 Enero 1945, una “DATA MEMORAVLE”.
Manadero en partida “France-Soir22/10:2010
