El 27 de Enero, el Diya Komemorativo del Holokosto es un diya enternasional para komemorar las viktimas del Holokosto, el jenosido ke tuvo komo rezultado el asasinado de sesh miliones de judyos, dos miliones de zinganos, kinze mil omoseksueles, i miliones de personas ke eran kontra el rejim de los nazis i sus kolaboradores.
Este diya fue dezignado por la Asamblea Jeneral el primer diya de Novembre del anyo 2005. La Asamblea Jeneral desido de markar un tal diya en el 24 de Enero, kuando se komemoro el sesentien aniversario de la liberasion de los kampos de konsantrasion, i en mezmo tiempo, ke fue la fin del Holokosto.
El 27 de Enero es la data kuando el mas grande kampo de konsantrasion, Auschwitz Birkenau fue liberado por las trupas sovietikas.
En el Diya Komemorativo del Holokosto, todos los paizes ke son miembros de los Estados Unidos, onoran la memoria de las viktimas, para prevenir las jenerasiones mansevas de defendersen de futuros aktos de jenosido.
Este diya rejekta la negasion del Holokosto, i kondema todos los aktos de entolerensia relijioza, akuzasiones, i violansia kontra personas o komunidades de orijin etniko, o de kreensias relijiozas. En este diya se repeta la emportansa de prezervar los sitios ke servieron komo kampos de konsantrasion, kampos de lavoro forsado, i prizones, para pueder establisar en estos lugares, ‘Programes de la Edukasion del Holokosto’.
El Diya Enternasional del Holokosto fue una inisiativa del Estado de İsrael. El Ministro de Relasiones Eksteriores de İsrael, Silvan Shalom,en la Asamblea Jeneral, reusho a azer pasar una ley por fiksar este diya komemorativo.
El teksto de esta ley tiene dos seksiones. La primera seksion es sovre la prezervasion del rekuerdo de los ke fueron asasinados en el Holokosto, i la segunda seksion es sovre la edukasion de las futures jenerasiones por prevenirlos de las orores del jenosido.
El tema del Diya Komemorativo de este anyo es:’Komunidades Endjuntos: Konstruir un Ponte’. Rekodrar las viktimas, ambezarmos de los yerros del pasado, i organizar eventos lokales es el buto de este diya. Defendersen i defender los otros kontra el odio, la diskriminasion, i la persekusion deve de ser la responsabilitad de kada persona.
Este diya mos da a todos la oportunidad de refleksionar sovre el pasado, i de krear komunidades mas fuertes en el futuro; komunidades ande el mundo entero se va sintir ovligado de kontravenir a la diskriminasion, i de avlar kontra el odio en kualsiker momento.
