Amanyana, Martes el 22 del mez de Enero 2013, sera sovre las tyerras de muestros antiguos avuelos, el dia de la eleksyon lejislativa ke desidera mas tadre del futuro governo Israelyano kon sus desizyones konformes a la vizyon ke el tendra de la situasyon del momento i de todo lo ke kale o no kale azer...
Oy, Lunes el 21/1/2013, mozotros ke bivimos ahuera del payis no puedemos ni devemos dar kualkyer opinyon... Es la mayoria del puevlo ke mora aya, ke bive kada evento no solo en su esprito, ma tambyen en sus karnes, ke tyene el derecho de desidir.
Kuala sea la seleksyon ke sera echa, ningun partido sera a el solo realmente mayoritaryo, i devra aunarse a otros. La sola koza ke se puede dezear es (antes de todo) una unyon del viktoryozo kon uno o dos mas chikos ke seran konsyentes de sus responsabilidad.
La nesesidad se azera tambyen sentir de una “Fuersa de Opozisyon” homojenea en sus varyos komponentes, lakuala sera en mizmo tyempo lojika i vigoroza, unida por un mizmo ideal de realizmo mesklado de ekidad, lo ke ayudara a topar el mijor kamino a sigir afin de ayegar a un estado de governansa ke asegurara la perenidad de Israel en el futuro. Una Fuersa de Opozisyon ke sera konsyente ke “lo ke aze de un puevlo una Grande Nasyon no es la dimensyon de su territoryo ma la importansa del proyekto de adelantamyento ke el yeva en si”.
Ay dos o tres semanas de esto, el Prezidente Shimon Perez avia deklarado frankamente, a boz alta, ke el era partizano de un programa ke tenia komo objetivo byen entendido la seguridad del Payis i tambyen la Paz.
El fue syempre un luchador por la solusyon de doz estados diferentes (el uno djudyo el otro palestinyano) ke puedran bivir lado kon lado en una atmosfera de respekto mutual, situasyon a la kuala se puedra ayegar unikamente grasyas a negosyasyones sin prejuisyos negativos prealavles. El fue mizmo asta ekspresar su konfiansa en favor de Mahmmud Abbas; deklarasyones ke provokaron protestasyones vehementes al seno del ‘Likud’ i de ‘Israel Beitenu’ ansi ke de munchos otros partidos de la “Derecha’, kaji todos partizanos de un”Grande Israel”..
Segun la Prensa internasyonal ke tyene sus korespondyentes en Israel:
“Para el partido sosyalisto dirijido por la djornalista Shelly Yachimovich, el objetivo prinsipal a alkansar es una mijoria flagrante de la situasyon ekonomika de la populasyon İsraelyana ke bive debasho el umbral de la provedad.”
“Tzipi Livni de su parte sostyene el objetivo de Shimon Perez. Eya afirmo ke el solo kamino posivle a sigir es de re-empesar las negosyasyones de Paz kon los palestinyanos, ke sea kon el ayudo de la Evropa, de los Estados Unidos o de la Onu.
Eya disho lo ke sige: Segun mi, el estatuto prezente no puedra rezolver el problema. Personalmente dezeo la kreasyon de un Estado Palestinyano a la kondisyon ke esto no danye los interesos vitales de muestro payis. Munchos en Israel kultivan ainda la ideolojia del “Grande Israel”. Esto es una politika muy peligroza para el futuro de muestro Estado Djudyo, no solo del punto de vista sekuritaryo, ma tambyen identitaryo. (Si sus dezeo se realiza) vyendra un momente en el futuro, ande muestros konsivdadinos arabos seran mas numerozos ke los djudyos.... kuando avlo de dos Estados, yo penso a mozotros, yo penso a Israel.” (fin de sitasyon)
De muestra parte, la sola koza ke mozotros djudyos de la Diaspora puedemos dezear es ke el Dyo Baruhu aklare el esprito de muestros korelijyonaryos Israelyanos i los ayude en sus seleksyon.
