La semana pasada tuve el grande plazer de enkontrar (akompanyado de su muy amavle mujer i de sus tres ninyos) François Azar shefe editoryalisto de la revista franseza titolada “Kaminando i avlando”..
Si... Avlimos en fransez, ma un fransez entrufado de palavras o de fragmentos de frazes en djudeo-espanyol, tal ke lo uzamos munchas vezes aki en Estambol... Aunke los sefaradim de Fransya son desde munchas jenerasyones antes profundamente introduzidos en la kultura de sus payis de nasimyento, munchos de entre eyos tyenen komo un eskarinyo persistyente de sus lingua etnika... lo ke produze en sus esprito komo una fuzyon de dos sivilizasyones.
El “djudeo-espanyol” es para munchos de entre eyos, komo una revendikasyon de sus orijenes ansestrales, kon sus uzos i kostumbres, todo en guadrando intakta la suma de las valores adkeridas en Fransya.
Al pareser, eyos no konosyeron los efektos nosivos del vyejo prejuisyo sosyo kultural ke mozotros konosimos ay de esto unas kuantas dekadas i ke ainda, de vez en kuando, se syente en algunos de muestros konsivdadinos... Para munchos sefarades de Fransya, la konosensya de la lingua de sus avuelos es komo un elemento suplementaryo, adjuntado a sus kultura jeneral..
Ay de esto aproksimativamente 15 o 20 anyos, durante un viyaje en la Espanya djudia, organizado por Jean Carasso (fundador i shefe redaktor de la byen konosida revista “La Lettre Sefarade”) Elie i yo aviamos tenido el plazer de konoser myembros del primer grupo de la asosyasyon ‘AKİ ESTAMOS les amis de la Lettre Sepharade...’ Entonses no eran muy numerozos, sus programa aunke muy riko era ainde un poko ezitante. Ma oy, despues unos kuantos anyos, las aktividades sosyo kulturales del grupo son multiples, indo del aprendisaje de la lingua asta un estudyo seryozo de sus ‘muzika’, ‘romansas’, ‘poezias’, ‘ovras literaryas’, ‘gizado’ ets ... ets...
En el editoryal del treser numero de la revista “Aki estamos” sinyado por Jenny Laneurie prezidente de la Asosyasyon i François Azar shefe editor de la dicha revista, eyos mos dizen ke el shifro de los myembros ya sovrepaso el umbral de 400 aderantes... Aktualmente . muevos proyektos son kontinualmente prezentados i munchos realizados; el anyo pasado una ‘Universidad de enverano judeo-Espanyol’ fue organizada i durante 5 dias se avlo, se konto, se kanto, se resito poemas kaji syempre en djudeo-Espanyol i tambyen se komyo unikamente platos gizados a la manera de muestras madres i avuelas...
Este anyo igualmente se proyekta “un muevo enkontro de enverano de una semana” al kual me invitaron a partisipar...espero ke lo puedra azer...
Se organizara tambyen una ekskursyon a partir de Fransya, a destinasyon de Izmir, entre el 25 Mayo i el 2 del mez de Junyo 2013, en el eskopo de konoser los myembros de esta komunidad i vijitar todo lo ke en el pasado karakterizava la vida de la populasyon djudia de esta sivdad.
Seria una muy buena okazyon para munchos de entre mozotros de azer tambyen el mizmo viaje, a la mizma data, afin de enkontrar los vijitadores fransezes i komınikar kon eyos durante unos kuantos dias... tenemos tantas kozas a ambezarmos los unos de los otros.
Ansi va la ermoza evolusyon del interes por la kultura i la lingua de muestros padres de la parte de munchos ‘djudeo-espanyol avlantes” de Fransya.
