No podriya topar yo un diya mas minasup (apropyado) ke oy, o mas egzagtamente diremos, de esta semana para azer un teksto semejante. Porke, antes unos kuantos diyas fyestimos mi mueva edad, lo ke kere dizir mas simplemente, mi aniversaryo. Kuanten!?.. Bueno, mas o menos el lektor ya lo save. Para mi esto sinyifika un shifro de mas en mi karta de nasimiento, i nada mas… Ma, asigun mis ijos, es un aniversaryo espesyal. Es achakes de esta okazyon ke pensi azer este artikolo.
En estos mezes dalkavo remarki una koza enteresante en meldando el “Şalom”. Naturalmente, meldo las novedades mizmo si no son en vezes muy freskas i espesyalmente, los eventos en muestra Komunidad. Tambien, me plaze meldar las kolumnas en turko, de syertos eskritores i fue ansi ke ize la remarka enteresante.
No se deke, enkontri en munchos tekstos un sujeto kaji komun: La “EDAD”.. Kon titolos diferentes komo “Envejeser o tomar anyos?” “Envejeser??” ets…Por egzempyo, la Sra. Tülay Gürler Kurtuluş, en su rubrika, eskrivyo “Envejeser o tomar anyos?” i esta tratando de un amigo de famiya…Un sinyor de 77 anyos ke prefero retirarse (o travarse a un kanton) desde la edad de 70 anyos. Un sinyor keshandose de su edad, al grado de no “KERER” ni salir de kaza kon el preteksto “Ya me envejesi!!” Es un preteksto klasiko de munchos de muestra edad.
Keridos amigos, no se si remarkatesh ke apunti partikolarmente el byervo kerer. Porke ay no kerer i “NO PUEDER”, lo ke troka enteramente el kavzo. Konosko personas ke reelmente no estan pudyendo partisipar a las aktividades de la vida malgrado sus grande dezeo. Estan munchas vezes komo espektatores de los diyas ke pasan tan presto. Enfin… Esto es otra facha de la vida.
Vinyendo a muestro sujeto, de mizmo, amigos ke eskriven regolarmente en muestro jurnal (no kero dar nombres) kon una ekspresyon kaji pesimista se estan keshando de sus edad i otras kozas semejantes…La verdad ke me enkanti (negativamente) kuando meldi sus propozitos.
Ya es verdad ke en el korso de los anyos mos estamos desvelopando seya fizikamente, seya mentalmente. Los anyos, el tyempo avagar, avagar estan azyendo sus lavoros de destruksyon. Naturalmente es imposivle de detenerlos. Lo ke vyene a dezir ke, lojikamente no puedemos kedar mansevos. Ma, en la mezura del posivle, puedemos konservar muestra sanedad fizika i mental. Aki kreo ke todos estamos d’akordo: antes de todo la salud...
Alora, si estamos achetando la realidad ke ekspozi, devemos byen emplear kada diya de muestra vida, afilu kada momento. Devemos valorizarlos i profitar de eyos. Ke manera? Es un poko difisil de dar una kurta repuesta. Solamente vo sitar un proverbo Ekosezo ke en un sensyo, syempre fue komo mi dotrina: “Las personas pensan ke en bivyendo se envejesen. Ma, es en NO bivyendo ke se azen vyejos...” Ay muncho de komentar sovre esta dicha, ke dizish? Yo lo ize a mi modo i esto kontente. A vozotros keridos amigos, de kitar una lisyon de estos byervos!
Oy los mansevos, kero dezir muestros ijos, inyetos, grasyas a la teknolojiya, pueden alkansar a todo modo de informasyon. Ma esto nunka sera igual a las eksperyensas de los aedados, a las lisyones ke se toma de los yerros en kada etapa de muestra egzistensya. Egzaktamente komo dize la kantika (mi preferada!) : “I know what it is to be young, but you don’t know what it is to be old...” “ Yo ya se lo ke es ser mansevo, ma tu no saves kualo es ser aedado...” Otruna ermoza fraza ekspresando un mundo de kozas...
No ay edad para ambezar, ganar muevas konosensyas. Puede ser semos de una syerta edad. Atansyon! no dishe vyejos, si mizmo mos kalifikan ansi. A mi no me aze ni friyo ni kalor la manera ke mos yaman. Si ser aedados sinyifika tener una relasyon kon la data de nasimyento eskrita en muestra karta de identitad, no tyene dinguna importansa para mozotros. Porke tenemos el privilejyo de posedar presyozos rekuerdos, eksperyensas de vida adjuntados kon sezudeza, un grande potansyel de tolerensya i kerensya.
a kontinuar...
