Entre munchos otros akontesimyentos por la mas parte atristantes de la semana pasada, meldi en la prensa ajena dos eventos ke me impresyonaron partikularmente i me izyeron muncho pensar..
El primer, un aksidente ke se produzyo en una estasyon de metro en los Estados Unidos, ande un ombre ke se topava sovre la plata forma kon otros viajadores, se kayo (no se a la sigida de kuala razon) sovre el kamino ferovyero ande un treno venia a toda velosidad...la muerte para el desmazalado era imminente i en un ultimo reflekso de konservasyon, el se esforso de engancharse en vano a la pared trajikamente liza sin el mas chiko orifisyo ande enkashar un dedo... Sorprendidos, komo immobilizados en sus estupor, los ke se topavan ahura no pensaron azer el mas chiko djesto par mirar de akudirlo... solo un mansevo parese aver guadrado su sangre fria... ma al lugar de tender la mano, el tuvo la sola reaksyon de tomar su kamera para fotografyar la terrivle sena final.
Puede ser ke para algunos amatores, el negativo de esta fotografia sera de un grande intereso, “la vizyon de los ultimos djestos de dezespero de un ombre entregado inevitavlemente a la muerte”... ma en todo kavzo el sera tambyen el mas monstruozamente sinistre del anyo, una performanse horrivle dedikada a la sola vanedad del ego.
El segundo fakto se paso en Suesya (Sued), ande un eskultor nombrado ‘Carl Michael von Hausswolff’ kreo una ovra de arte, no kon marmol o kualkyer otro materyal similar , ma kon la siniza mesklada de agua de uno de muestros ermanos matados i kemados en un kampo de konsentrasyon ke el avia rovado sinko anyos antes.
Algunos diran puedeser “inovasyon artistika”... otros kon razon “inyovle profanasyon”... en todo kavzo es una akto revoltante de banalizasyon de la Shoah, komo tambyen de negasyon de la sakralidad de la vida..
Ke esta akontesyendo a la kriansa humana? Ke esta bushkando el ombre del 21em siglo? Azer avlar de si mizmo, de su sola persona, en banalizando el drama de los otros? Parese aver en el komo un akoso ke lo pusha a kerer absolutamente afirmarse, kual sea el presyo moral a pagar, konsekuensa sin dubyo de una vida de mas a mas kaotika.... Indiferensya delantre la sufriensa del otro, pletos i matansinas kaji fratrisides.
Malgrado las grandes deskuvyertas syentifikas entre las kualas munchas son realmente salvaderas, es ke el mundo evoluo en direksyon del Byen o del Mal? No se puede nyegar ke aktualmente en el espasyo politiko, vemos kada dia, aktos krueles perpetrados entre kombatantes de un mizmo puevlo ke tyenen las mizmas kreensas, los mizmos simboles, preseptos o paradigmos, gerreyadores ke se matan los unos los otros kon la mizma salvajeria por una simple diferensya de vizyon.
