Kaji 100.000 personas estavan reunidas shabat demanyana el 8 del mez koryente sovre la Plasa de la Katiba de Gazza, para selebrar el ventesinkyen (25en) aniversaryo de la kreasyon del Hamas, entre eyas Khaled Mechael, shefe en egzilyo de este Movimyento İslamiko.
Komo syempre, su diskorso fue dirijido kontra Israel.... aunar todos los palestinyanos, los de Sisjordania i los de Gaza, liberar enteramente la totalidad del lugar i komo se asperava “erradikar kompletamente la prezensya Israelyana”.
Syempre el mizmo leitmotivo, las mizmas palavras de odyo, syempre el imperyozo dezeo del derrokio del Payis Ebreo instalado sovre las tyerras de sus propyos ansestros.
La nesesidad se aze de mas a mas sentir de un Israel muy fuerte kon frontyeras byen definidas i seguras, komo tambyen, antes de todo, de la mizma amistad i el mizmo respekto i kudyo de la parte de las grandes potensyas ke asistyeron i ayudaron a su kreasyon.
Sovre ke superfisia de tereno ke sea, mas chiko o mas grande, lo ke aze la fuersa i la grandor de muestro chiko puevlo es su Syensya, su Lavoro i su Mirada tornada en direksyon del futuro, sin nunka olvidarse los preseptos de su sakro pasado.
