La ventana de vuestra ermana: LA EMPORTANSA DE LA SANEDAD

Şeli GAON Judeo-Espanyol
28 Kasım 2012 Çarşamba

La sanedad no es solamente no tener hazinuras; es estar en una situasyon perfekta sovre los puntos; fizikos, mentales i el byen estar sosyal.

La sanedad es un fakto sosyal porke:

- Los elementos ke forman la sanedad son sosyales.

- Las razones ke kreen la chika salud (sağlıksızlık) son sosyales. Entonses;

- La solusyon de tener la salud buena es sosyal.

Estamos bivyendo una vida kanseryoza, kon problemes en todos los puntos de vista i estamos syempre en relasyon kon munchas personas, ijas, ijos, maridos, madres, padres, amigas, amigos…

Es verdad ke los evenementos influensan (etkilemek) la sanedad. Para pueder entender la persona, para pueder apresyar la hazinura u la sanedad de la persona; kale saver las relasyones ke tyene kon su entorno.

Una persona sana tyene estas partikularitades (özellik):

- Una enerjiya bastante para no enfluensarse del stres de kada dia,

- Una atitud (davranış) pozitiva kon el optimismo endjuntos, i en tomando una desizyon ser kerensyozo,

- Ser kalmo en las situasyones urjentes (acil),

- No inyervar a todo modo de kozas,

- Ser syempre en mizmo nivel (seviye) de komporto.

La sanedad de la persona es la valor la mas sakra en el mundo.

Malorosamente la persona entyende la valor de la sanedad kuando la perye.

Antes 15 dias pasi un desrepozo, i me yevaron al ospital. Veramente la persona es atada kon un ilo a la vida. Todo akontese en un punto. El punto ke estamos bivyendo es el mas presyozo. En un punto todo puede trokar i eskapar.

Lo mas emportante para mi fue; el aserkamyento kerensyozo de los doktores, ke me dyeron moral en okupandosen para meterme en pyes un momento mas presto. Entonses kero remersyar; al “Prof. Dr. Mois BAHAR”, al doktor Emil GOLDENBERG i al doktor Ari BOYACIYAN ke fueron para mi ancelos para ganar la sanedad.

A mi idea; la kanserya, los penseryos i no pueder solusyonar los problemes; son faktos ke influensan negativamente la sanedad.

No dar emportansa a nada, no pensar muncho, deshar todo asegun es (olduğu gibi), es la solusyon de estar en ekilibro (denge).

Lo ke me izo plazer en esta perioda ke estuve en el ospital fue la kerensya de la ermandad (kardeşlik sevgisi) de todo mi entorno.

Los korasones son resiprokos (karşılıklı). Una persona ke kere byen a todos, es amado por todos. Por ser amado, kerer byen al den frente i dar la valor menesteroza es lo mas emportante para mi. Para pueder partajar las alegrias i las tristezas tenemos menester de kerer byen i de ser amados.

Azer piadades, tener afeksyon al den frente son los sinyos de la kerensya.

Munchos amigos bushkaron para demandar komo esto, otros vinyeron a vijitar al ospital, otras amigas ayudaron kuando torni a kaza.

Las palavras de kerensya son moralmente un trezoro para la persona. La kerensya es un sentimyento ke tyene komo baza, el devuamyento, la afeksyon i la piadad.

Mizmo ke ay dos semanas ke me esto repozando en kaza, oy sali para un evenemento alegre, el kazamyento del ijo de mi amiga Dora Anri Niyego, kon la ija de Çela Eli Alfasa.

Una boda en Neve-Shalom es un miraklo sentimental i muy orozo.

Un kazamyento es un evenemento ke se produisa kon la veluntad de una mujer i un ombre ke se keren byen i demanda muncho esforso. La amistad resiproko, es un kontakto limpido, muy presyozo entre dos keridos, i aze naser la kerensya.

Oy Neve-Shalom estava yeno de djente, la sinagoga byen ornada de rozas blankas, todos muy byen vistidos kon chapeyos, las famiyas i los novyos riendo en el talamon.

El novyo entro kon su madre i padre sin azer asperar. La novya kon su padre i su famiya de delantre.

Fue un dia reushido, muy byen organizado.

Muestro dezeo es; ke los novyos seygan syempre orozos, respektuozos i reushidos en sus vidas i ke tengan la kerensya, la amor i la responsabilitad de kreer una famiya.