Una letra ke vos transmetemos kon grande alegria

Klara PERAHYA Judeo-Espanyol
28 Kasım 2012 Çarşamba

Venimos de resivir de  parte de la sinyora Liliana Benveniste de Buenos Aires, una letra muy elojyoza konsernando el inkomparavle lavoro de muestro kerido amigo ‹zzet Bana ke, unos kuantos anyos antes, avia fundado el grupo muzikal de ninyos “Las Estreikas de Estanbol” i ke aktualmente, durant su resyente viaje en Arjentina, partisipo kon sus ideas i konsejos al proyekto de fraguar (esta vez en un payis jeografikamente leshano) el grupo ke se yamara “Las Estreyikas de Buenos Aires”.

Toda muestra estima i muestra apresyasyon a muestro kerido korelijyonaryo i konsivdadino Izzet Bana.

Debasho de estas linyas, vos transmetemos tekstualmente i en su integralidad, la dicha letra mandada de Buenos Aires:

 

Aze kuatro anyos, en 2008, estuvi de vijita en Estambol i tuvi el grande plazer de konoser en persona a Izzet Bana, grande maestro i ekselente persona, tanto konosido por mi de Los Pasharos Sefaradis i de las Estreyikas d’Estambol, el ermozo koro de kriaturas.

En estos diyas tuvi el mazal de partajar una de sus klasas kon algunas de las Estreyikas i mizmo kantimos todos endjuntos, yo kanti kantes de eyos i eyos kantes mios, un momento muy  orozo para mi.

De algun tiempo atras, desde ke sinti por primera vez a las Estreyikas, ma de este momento muncho mas, me kedo la idea de fraguar Las Estreyikas de Buenos Aires, i avlimos kon Izzet por mezo de mails, ma en esto se kedo akel esfuenyo muestro, solo letras.

Por invitasion del senyor Mauricio Stamati, de la komunitá de estambolis Beneh Mizra, el mez pazado Izzet arivo a Buenos Aires, i trusho kon sï el fuerte dezeo de ir a las eskolas i amostrar el lavoro del koro de Estambol, i tambien de azer un koro de kriaturas aki, ke es la mijor manera de ke muestra muzika ermoza se pase a las proksimas djenerasiones.

Por mi lavoro kon la muzika, ke es por esto ke konosko a los direktores de eskolas djudiyas, avli kon algunos de eyos, i mizmo ke fue en kurto tiempo, dos de las mas grandes eskolas de Buenos Aires, Scholem Aleijem y Arlene Fern, i kon ayuda de la profesora i amiga Ester Hazan tambien en la chika eskola Bereshit, se pudo organizar tres enkontros, uno en kada eskola, ande mos aresivieron kon los brasos aviertos.

En la eskola Arlene Fern pasimos por 5 salas de vente elevos kada una kon ninyos de entre 10 i 11 anyos, en la eskola Scholem Aleijem mos aprontaron el grande salon de aktos kon sien i vente elevos de 9 a 10 anyos i en la eskola Bereshit estuvimos kon elevos de 6 i 7 anyos.

Kon muncha atansion, sienes de kriaturas sintieron sovre el proyekto i mizmo kantaron kon Izzet i kon mi, algunas de las kantikas de las Estreyikas kon grande plazer i alegria.

La vijita a kada una de las eskolas, ande fuimos aresividos kon muncho karinyo i rengrasiamiento por parte de maestros, kordinatores i derektores, fue akompanyada de la entrega de un disko de las Estreyikas d’Estambol a kada elevo, para ke yeve a sus kaza los kantes i mizmo lo pueda amostrar a sus djenitores.

Izzet ya tiene kriado dos koros de Estreyikas afuera de la Turkia, uno en Israel i el otro en Italia.

Agora, kon este grande paso en muestro proyekto, azeremos mas planes para fraguar  no solo a las Estreyikas de Buenos Aires, sino ke a  “Las Estreyikas del Mundo”.

Por siguro este proyekto es muy muncho grande, i mizmo sera de lavorar grandemente, ma los esfuenyos para  ke las kriaturas se ambezen muestro legado muzikal i ke muestros kantes  kontinuen a ser kantados por las proksimas djenerasiones es muy fuerte!

Es por esto ke invitamos a los profesores i muzisienes ke keran partajar kon mozos el lavoro de kriar koros de kriaturas en sus paizes i sivdades, a eskrivirmos a [email protected]. Mizmo ansi tambien si algunos partikolares o institusiones keren kolavorar a auspisiar el proyekto mos puede eskrivir ayí.

Asperamos ke presto podamos ver fraguados munchos koros de kriaturas i ansí anchear las Estreyikas, un esfuenyo ke puede ser se aga realidad!