Una kestyon me vyene munchas vezes al meoyo: “Eske el djudaizmo no es un poko el empesijo de la globalizasyon?”
Son nombrozas las personas ke pensan ke la globalizasyon va traer una monotonia i ke munchos paizes van a pedrer sus otentisidad, kostumbres, uzos de bivir ets... i ke los rikos van a ser mas rikos i los proves mas proves. Ma ultimamente, vemos ke kon la kriza mundial, los puevlos rikos se emprovesen i los puevlos proves amelioran sus situasyon.
Mis ojos i mi koroson me dizen ke la Globalizasyon es una prosedura de integrasyon enternasyonal, una maraviya del Dio para konoser, entender, dialogar, unisar i bushkar puntos para ver la vida de un angulo mas u menos semejante i asi ayudar a nuestro aedado mundo de alkansar a un modo de paz.
Empesaremos kon muestra historia judia, eya empeso kon un viaje.
1.- Avraham Avinu, pensando ke era absurdo de adorar unas estatuas de fabrikasion humana rompio las idoles ke fabrikava su padre. Para el la divinidad devia ekzistir en todas las partes del mundo, sin empesijo i sin fin, un Dio global ke todos deven de adorar, Rey de los reyes i Dio de los dios.
Los ke se kreyeron, se metieron en kamino kon el para formar un puevlo diferente ke yevava ande se iva su divinidad. Ansi, kon Avraham se formo el konsepto del Dio uniko i kon un otro judio Jesus este konsepto se izo global, grasyas al prozelitizmo de la kristiandad..
2.- El segundo viaje fue el de Yaakov su inyeto. El yevo a sus ermanos a Ayifto para salvarlos de la ambre y para ke tengan una vida mas humana. Ma este viaje se termino kon un esklavaje i despues de 400 anyos vino el tiempo del treser viaje.
3.- El treser viaje fue el viaje sovre el rio, de Moshe rabenu, en el sestiko ande lo metio su madre. Engrandesido komo un prens, el pudo salvar a su puevlo del esklavaje para yevarlos a la tierra de Kanaan.
4.- İ asi empeso el viaje de 40 anyos. Este puevlo se uniso i pudo yegar a su Tierra Santa. La ley de Moshe, la Torah, fue expandida y akseptada por los otros profetas en una version de justisia i de paz. Repozarse un dia de la semana i no azer lavorar a sus servidores el mismo dia es un empesijo de los derechos humanos mundiales.
Moshe rabenu fue kazado kon una sola mujer i esto pudo dar un egzemplo de monogamia a su puevlo. Ma, el destino de este puevlo era de viajar malgrado su voluntad. El mas grande paso de la globalizasyon estava empesando.
5.-Despues ke Tilus, el emperador de Roma destruyo el beit amigdash
i Masada, los Judios fista la konstruksyon de Israel en 1948 fueron obligados de bivir en la diaspora. Kon los Gregos, eyos se fueron a “Micro Asia” (La Anatolia de oy) i a la Grecia. Kon los Romanos a la Italia y a la Europa.
Ansi empeso la dispersion de los Judios en todas las sivilizasyones del mundo: del sentro de Europa a los deziertos de la Arabia ... de los stepes de Rusia fista el Norte i el Sud de la Amerika... de la Afrika fista la China i el Japon kon el kamino de seda, no desharon pais ande no se installaron.
A kontinuar la proksima semana
SÜZET FRANSEZ
