La viktorya de Barack Obama en la eleksyon prezidensyal de los Estados Unidos de martes pasado, el 6 del mez koryente, arranko un sospiro de rekonforto del korason de munchas madres syempre ansyozas de ver sus ijos murir en kampos de gerra .
Barack Obama es un ombre de paz ...el fue durante su primer mandato i es syempre partizano de un largo periodo de diskusyones si no amigavles ma a lo manko konsentidas de las dos partas, antes de kualkyer aksyon militar.
Es un fakto real ke ningun problema puede realmente ser rezolvido sovre kualkyer kampo de gerra; keda syempre, despues mizmo las luchas las mas djustas, komo un pasto de sangre i sovre todo las solombras impalpavles de miles de inosentes ke pagaron de sus vida la glorya del triumfo.
Kual ke sea el problema, la sola verdadera viktorya es akeya ke se puede obtener kon la persuasyon, mizmo si kosta envezes a los partisipantes, danyos o perjuisyos de orgolyo...Ansi una de las primeras kozas ke Barak Obama izo despues de aver sido reelijido, fue de kombidar a la kaza Blanka, los shefes del partido Republikano adverso afin de lavorar endjuntos para topar una solusyon a la kriza ekonomika aktual i salvar ansi milyones de personas de la prekaridad i de la mizerya.
En politika estranjera, uno de sus grandes objetivos es de parvenir a rezolver el problema İsraelo-palestinyano grasyas a la kreasyon de un estado palestinyano enteramente otonomo i independyente, lo ke (segun el) ayudara a estableser un empesijo de koezyon en la atmosfera kaotika de la rejyon.
Benyamin Netanyahu fue uno de los primeros a felisitar Obama por su nominasyon, aunke en su ultimo viaje en los Estados Unidos antes la eleksyon, el avia sostenido avyertamente la kandidatura de Romney, vyejo amigo de mas de trenta anyos.
El aktual prezidente Amerikano resivyo sus felisitasyones sin azer kualkyer objeksyon ni aluzyon i konfirmo su fidelidad i su grande interes al destino de Israel.
İ mizmo de otra parte, segun lo ke eskrive la revista elektronika franseza “Le point’’, datada de Lunes el 12 del mez koryente, el sinyifiko klaramente al prezidente del Estado Palestinyano Mahmud Abbas, su refuzo de akseptar su propozisyon renovelada de asistir a las sesyones del konsilyo de la ONU.
Eske una solusyon al problema İsraelo- palestinyano por la kuala las dos partes devran azer sakrifisyos resiprokos, puedra realmente apareser a la sigida de muevas negosyasyones? Esto provablemente puedra adulsar la atmosfera de este espasyo jeografiko del mundo i ayudar a rezolver situasyones ke paresen kaji insolvavles,
Komo mo lo ambeza la Istorya, todo es posivle en la esfera politika.
