En la vakansa ke tuvo lugar antes dyes dias, tuvimos la shans de ser envitados por un amigo de mi marido a una pansyon ke tyene en Kekova, en el kazal (köy) de “Üçağız”.
“Kekova” es una isla chika de trezyentas personas en Antalya. Fina unos kuantos anyos antes, no aviya kamino para iyir. Se ayegava aki solamente por la mar.
Oy ay un kamino ke sureya tres oras de Antalya kon araba. Oy mas de personas ay, las olas (dalga), el ayre i las ruvinas istorikas (tarihi kalıntı) en el silensyo de Kekova. La majoritad de estas ruvinas istorikas se topan debasho la mar a kavza ke el nivel de la agua de la mar se aviya enaltesido antes munchos anyos.
En el kazal “Üçağız” ay kazas chikas de pyedras, restorantes ande se puede komer pishkados i magazenes.
En este kazal se topa miles de tombas i de ruvinas istorikas del tyempo de los romanos. La tomba la mas vyeja apartyene a “Kluvanimi”. Esta tomba ke tyene la forma de una kaza, allado se topa un alivyo (kabartma) de un mansevo.
A “Üçağız” las kazas son konstruidas enriva de las ruvinas istorikas ke son del tyempo romana i bizantina.
En estas konstruksyones se utilizo las pyedras i las kolonas de las ruvinas.
La pansyon ke mos kedimos; una kaza tipika konstruida de pyedras de dos etajes en medyo de una grande guerta ande aviya arvoles de agranadas (nar), de mansanas i de portokales.
El tyempo tanto kayente ke mos fuimos a la mar kaji kada dia.
La kolor de la mar no se puede dar a entender.
Una partida kolor blu, la otra partida vedre, ande aviya arena turkuaz, muy limpya i klara ke se estava vyendo el dip de la mar, las pyedras i todo lo ke ay debasho.
La natura multikolor, kon las rozas diferentes, las frutas, los pasharos, los perros, gatos, kavras (keçi), arvoles de munchos sortes; esto todo komo un tablo delantre de muestros ojos.
Las personas pueden estar orozos kon chikos plazeres en la vida.
Komimos, bevimos, avlimos, meldimos, entrimos a la mar, kaminimos i mos repozimos.
El aver limpyo, la mar a dos pasos i el kalmo del kazal kon la kara riyendo de los kazalinos mos repozo moralmente i mos kito las ansyas en azyendo olvidar los problemes de la vida. Fuyir de la sivdad kanseryoza i muy reboltoneyoza fue para mozotros un grande trokamyento.
Tener amigos buenos es un trezoro en la vida.
Yo penso ke; partajar todo modo de evenementos kon los ke mos sintimos serkanos komo la famiya, ermanos u amigos, mos fasilita las difikultades de la vida.
En este kazal, todos komo una famiya estan bivyendo endjuntos. İ komo de arisivida!....
La kumida prensipal era el peshkado ke se peshko akel punto fresko i savrozo.
Aviya otras famiyas en la pansyon ke vinyeron para pasar las vakansas. Todos muy modestos, saludando al den frente i dandole onor, avlando i pasando el dia entero endjuntos.
Las vakansas son un konsepto emportante para pueder fuyir del monotonizmo de kada dia. La persona tyene menester de repozarse fizikamente i moralmente para pueder kontinuar a rezistir a los puntos negativos de la vida.
Teneremos syempre el guste de tomar plazer i de bivir el momento solamente, porke no savemos lo ke mos va afitar despues de un segondo.
Vos oguro una invyernada klara, kon sanedad lo mas emportante, i kon muncha felisitad, keridos lektores.
