LAS REUSHITAS EN LOS LAVOROS DE LOS GANADORES DE LOS PREMIOS : NOBEL 2012

Dora NİYEGO Judeo-Espanyol
1 Kasım 2012 Perşembe

Komo kada anyo, los judios ne mankaron de ganar munchos Premios Nobel. El setentisinko por sien de los ganadores de los Premios Nobel 2012 son judios.

El judio amerikano Robert Lefkowitz i su kolega Brian Kobilka resivieron el Premio Nobel de Kemika. Sus estudios sovre los reseptores en el puerpo de la persona ke mos permete de reaksionar a los sınyales eksteriores, los izo los ganadores de este premio.

El sientifiko Serge Haroche i su kolega David Wineland, fueron los ganadores del Premio Nobel de Fizika. Haroche es un judio fransez nasido en Maroko, i Wineland es amerikano. Sus estudios toparon solusiones a los sujetos de seleksionar i mezurar individualamente los fotones i los iones. Sus lavoro trusho una mueva perspektiva al mundo mikroskopiko.El lavoro de estos dos fizikos ke toparon remedios para mezurar los kuantum granos sin deteriorarlos, era una koza ke los investigatores pensavan ke es emposivle. Este lavoro puede orientar a konstruir un muevo espesio de super rapido kompudador, bazado enriva de kuantum fizika. La Royal Akedemia Sueda de Siensas, rekompanso los dos sientifikos kon ocho miliones de dolares.

El judio amerikano Alvin Roth, i su kolega amerikana Lloyd Shapley fueron los ganadores del Premio Nobel de Ekonomika. El lavoro pionero de los ekonomistos los ayudo a topar una teoria ke se puede aplikar por todo modo de persona. El ekonomisto de setenta anyos de edad, Alvin Rurh, esta lavorando en el Departamento de Administrasion de la Universidad Harward, i su kolega el profesor de ochenta i mueve anyos de edad, Lloyd Shepley de la Universidad de Kalifornia, tienen relasiones ekonomikas kon Israel. Puede ser ke el kuantum komputador va trokar muesta vida en este siglo komo el klasıko komputador lo izo en el siglo ke pasimos.

El eskridor chino, Mo Yan, fue el ganador del Premio Nobel de Literatura de este anyo. Mo Yan fue el primer chino ke resivio un Premio Nobel. La Akademia Sueda le dio este premio por su reushita en ‘la fuzion de los kuentos populares, la istoria, i el kontamporano’.

Dos sientifikos fueron los ganadores del Premio Nobel de Fiziolojia, o Medisina. Los dos sientifikos ayudaron a senter las bazes para la medisina rejenerativa, ke es la idea de rekonstruir el puerpo kon tejados obtenidos de sus propios selulas. Estos dos sientifikos son John B. Gurdon de la Universidad de Cambridge en la Angleterra, i Shinya Yamanaka de la Universidad de Kyoto en Japonya.

La Uninion Evropea resivio el Premio Nobel de la Pas. La Union Evropea, durante mas de sesh dekadas, kontribuyo a la promosion de la pas i los derechos de la rekonsiliasion, la demokrasia i los derechos umanos en la Evropa.