NEW YORK EN ESTADO DE IMMOBILIDAD

Klara PERAHYA Judeo-Espanyol
1 Kasım 2012 Perşembe

Desde Lunes, vimos  en las televizyones ”la vizyon de New York kon sus avenidas kaji vazias, sus magazenes por la mas parte serrados i su kalmo insolito anunsyador de oras difisiles a bivir”. Si, desde lunes de manyana la sivdad yevava en eya el prezaje de un  sometimyento trajiko a dekretos superyores sovre los kualos ningun esforso  humano palpavle puedra tener una kulkyer influensa.

New York, una de las sivdades las mas aktivas i las mas animadas del mundo, ande en supito, el movimyente paresyo  ser asinyado al immobilizmo i las bozes humanas kondenadas al silensyo .

New York kayado, New Yor immovil, New York en la insertidumbre de los momentos a venir, vazyado de todo lo ke aze su vida de kada dia i de su vitalidad, New york  entregado al kapricho de los ayres i de las olas ansi ke a la fantezia de un destino indesizo.

Es syempre ansi en la vida del ombre: anksyedad i inkyetud de lo ke sera el minuto a venir, komo un eternal dubyo ke lo persigera syempre.

İ Martes de manyana, bilancho de los muertos en New York, espesyalmente en el Sud de Manhattan i mizmo al sentro... fachadas i techos de immobles parsyalmente destruidos...insendyos i obskuridad a la sigida de jeneradores de elektrisidad en estado de avaria.

Grandor i mizerya de una de las mas grandes potensyas del mundo.