El kavzo ‘Dominique Strauss Kahn’ problema difisil a entender

Klara PERAHYA Judeo-Espanyol
17 Ekim 2012 Çarşamba

Ya se ke la prezente eskrita va ravyar munchos de mis sinseros amigos de Fransya komo tambyen de aki İstanbul ke me son muy keridos i loskualos me rekomendaron  de no eskrivir  mas  sovre  el kavzo ‘Dominique Strauss-Khan’ .

Apresyo muncho sus kudyo, ma envezes ay kozas ke la persona syente el menester de dezir, kestyones al pareser sin repuesta ke mos sentimos ovligados de formular.

Komo por seguro kaji todos ya mos rendimos  kuento, desde mas de un anyo, ay ainda en Fransya un djenero de  terrivle deskriminasyon  i de ravya salvaje kontra Dominique Strauss Khan, sin prealablemente konsakrar un solo minuto a la refleksyon ni a kualkyer  bushkida de la verdadera realidad .

Uvo espontaneamente una horrivle sanksyon publika bazada al empesijo sovre las simples deklarasyones de una mujer inkulta ke lo akuzo de ‘agresyon seksual’ , myentras ke munchos medikos deklararon ke era una simple  relasyon seksual.

Kale byen entendido achetar ke Strauss Kahn aunke ombre de una intelijensya superyor, tuvo tambyen su  parte de responsabilidad en la situasyon prezente. No ay dubyo ke el es un grande amator de  plazeres seksuales, lo ke nunka eskondyo; el fue probavlemente  kulpante delantre su mujer i sus ijos, los kualos  kedaron todos unidos para sostenerlo...i de mezmo, delantre la dinyidad ke egzijia  su aspirasyon a la Prezidensya de la Republika Franseza.

Su natura propya i  su instikto de ombre triumfante  ke evoluo un largo tyempo en una atmosfera  de admirasyon kaji jeneral  por su inkontestavle kapasidad profesyonal, fueron  faktores ke tambyen kontribuyeron muncho a este estado de kozas...

Byen antes el triste evento  del Hotel Sofitel en los Estados Unidos, el ya avia dicho lo sigyente: “Tres kozas puedran impedir mi nominasyon a la prezidensya: ‘la rikeza de mi konsorte’, ‘mis relasyones kon varyas otras mujeres’, i...mi ‘djudeidad”.

Esto dicho, mos demandamos : Asta ke grado ‘el fakto de tener relasyones dizeremos illejitimas kon otras mujeres ke la suya ’ djustifika el kastigo de ser tratado komo un vulgar kriminal, arrastado en el lodo i  ekspozado a la  burla , espesyalmente de la parte de una syerta prensa avida de novedades sensasyonales?’.

El fue persigido por el akoso de una masa eteroklita de ombres i mujeres dezeozos puede ser de ver la deskadensya de un ombre ke  sentian ser superyor a eyos . El fue akulpado antes  ke la mas chika enkuesta fuera echa sovre la moralidad de la mujer ke introduzyo la kesha, i antes ke un kualkyer djuzgamyento djudisyal fuera pronunsyado.

Fue lo mezmo por las varyas akuzasyones prezentadas a los djuzgos Fransezes por  ‘tentativas de agresyon’ konsernando kavzos vyejos de 7 anyos, ande ningun elemento puede ser, oy en dia, kontrolado.

Por empesar, komo ya lo tengo dicho otra vez, el termo ‘tentativa de agresyon seksual’ es muy vago; el puede ser simplemente un banal akto de kortezia en el eskopo de obtener un sinyo de konsentimyento de la parte de una mujer... lo ke realmente, en muestra epoka, no es un akto de verdadera agresyon, espesyalmente en un payis  ke asta dos o tres anyos antes era mas o menos permisivo.   

 Una koza es segura, Dominique Strauss-Khan  no fue, asta oy en dia, akulpado djudisyalmente de ningun akto de agresyon seksual, lo ke  prova la absensya de una real konsistensya en  las  varyas akuzasyones echas a este sujeto.

Por seguro ke esto no lo blankea enteramente; uvo  yeros de su parte, ma no de una dimensyon a djustifikar el nivel inyovle de  asko ke el inspira ainda en su propyo payis..

Ay de esto  una o dos semanas , la sinyora Mazarine Peugeot, ija klandestina del Prezidente François Mitterand, se permetyo de dezir  ke DSK es un djenero de kanser.... Un komentador de esta estranya remarka disho kon muncha sinseridad: “....palavra muy sorprendyente en la boka de la ija de un ombre ke al momento de su eleksyon avia eskondido a sus elektores la egzistensya de su ninya illejitima, (lo ke el tenia el dover de deklarar) i sovre todo el kontinuo durante su prezidensya a mantener relasyones kon personas ke durante la terrivle segunda gerra mundyal, avian partisipado direktamente o indirektamente a la deportasyon de munchos djudyos...”  En efekto, aparte flakas kontestasyones, no se avia oyido entonses ninguna verdadera kritika.

Deke esta diferensya entre los dos kavzos, esta induljensya para Mitterand i esta severidad inhumana para DSK malgrado los grandes servisyos ke el  rendyo a la ekonomia mundyal grasyas a sus ideas i su lavoro?,.

 El dia ande el avia ido saludar las personas kon las kualas el avia kolavorado en la İMF, uno de sus grandes kolegas de orijen araba, avia dicho: “Strauss Kahn humanizo muestra İnstitusyon, el peno muncho para realsar el nivel de vida de los puevlos los mas desfavorizados”

Oy en dia DSK empeso a suvir en la estima mundyal i gozar de toda la konsiderasyon de la alta esfera pensante ahuera de Fransya, el es kombidado en varyos serklos de refleksyon internasyonal, munchas prestijyozas universidades le avyeron sus puertas, numerozos payizes se referan a sus teorias i le demandan de partisipar a kolokyos de grande  importansya.

El, de leshos, sugjero una idea a la Almanya i la Fransya para parvenir a ekilibrar la ekonomia Evropea.....Es ke eya sera aplikada? Los dias avlaran.