Vos transmetemos debasho estas linyas una letra ke venimos de risivir de la parte de Rachel Bortnick:
“Renasimiento en Edirne”
“Meldi kon grande alegria, en el Salom, ke la grande sinagoga de Edirne (Adrinople) en Turkia se esta restorando en su forma orijinal, i se espera ke va estar pronta en 2017, en el 100en aniversaryo de su aviertura. Entre mientres van a restorar tambien siertos otros edifisios djudios de la sivdad. Podesh ver fotos, djuntos kon el artikolo (en turko) en:https://www.salom.com.tr/haber/84143#.UFpr7xzTE5U(El titolo, en traduksion, es komo lo eskrivi yo ariva: “Renasimiento en Edirne”
Ya savesh ke yo no so de Edirne, ma konosko personas de ayi, i no me olvido del dia ke vijiti la sivdad i la sinagoga en Oktobre de 1991, giyado por Sara Mitrani, ke esta mensionada en el artikolo. Eya i su marido Rifat son los UNIKOS djudios ke dainda moran en Edirne, sivdad ke fue muy emportante en la istoria sefaradi, i tenia 28000 djudios antes de la Primera Gerra Mundial. Sara i Rifat fueron los ultimos ke se avian kazado en esta kehila (me parese en 1983), antes de ser abandonada. Me akodro la emosion de Sara de ver en ke hal aviya kayido akel lugar, un templo tan sakro i elegante, i yeno de famiya, amigos i keridos, i yeno de flores i alegria en las bodas i fiestas. El dia de muestra vijita, los friyos ya avian empesado, i lo mas de los mobles (de djevis, nogal, lavrados de mano) ya no estavan - siendo ke fueron rovados para kemar por lenya. Avia un burako en el tavan, i pasharikos bolando por arientro. En basho topi unas ojas suzias de un livro de tefila, las alevanti, las bezi, me las guadri, i anyos despues se las mandi a un amigo nasido en Edirne. El artikolo mos dize ke el arshitekto i los lavoradores de la restorasion se alegraron de resivir a los vijitadores de Estambol, i asperan ke los djudios turkanos, i sovre todo los orijinarios de Edirne (los “endernelis”) i sus desendientes van a enteresarsen en sus lavoro. El Dio ke mos de vida i salud para poder azer una vijita a Edirne en 2017. Kon este mesaje, kero mandar mis amistades a Sara Mitrani, mezo el eskritor del artikolo Moiz Gabay.
