NO KEDAR en la SOLOMBRA -2

kuantas personas van a meldar estas linyas. No es un artikolo ke esto eskrivyendo, ma en realidad es otruna vez un “apelo”, una “yamada” ke esto azyendo a los lektores. Antes unos, kuantos anyos, poko despues el “Amanesimiento” de muestra revista “El Amaneser” eskrivi un teksto semejante i a kada okazyon ke topi, en mis eskritas repeti este apelo.

Coya DELEVİ Judeo-Espanyol
3 Ekim 2012 Çarşamba

Si reelmente keremos alkansar a la luz del sol, devemos salir de la solombra”. Esta refleksyon, la sinti durante un debate, en un kanal de la T.V. Esto regretando de no pueder akodrarme egzaktamente ken la disho. Ma, ya se ke era un politisyen i ekonomisto en un reportaje, a la okazyon de su nominasyon a un importante posto internasyonal. En akeya entrevista todas las demandas i los komentaryos eran sentralizados sovre la ekonomiya i politika. Naturalmente, yo no penso tokar a este sujeto, de dinguna manera. Par kontra, la sovredicha refleksyon, kon una asosyasyon de ideas, me izo pensar a “EL AMANESER”, el orgolyo muestro.

Desde el seminaryo del Enero 2004, realizado kon la inisyativa del “Sentro De Investigasyones Sovre La Kultura Sefaradi-Otomana-Turka”, ya se ke Karen  Şarhon, perkuro muncho a publikar una revista en Ladino. Puede ser ke esto tomo tyempo, fue un poko avagarozo. Ma, yo, personalmente, fui testigo de todos los esforsos, a los kualos, muestro uniko peryodiko “ŞALOM”, dyo un grande ayudo indiskutivle. Karen izo diversas yamadas mezo muestro jurnal, aderesandose a todos, aki en Turkiya, afuera i en la “Diaspora”, kapaches o dezeozos de eskrivir en Judeo-Espanyol.

Ma, espesyalmente aki, komo aviya echo egzaktamente, el Sr. Bicerano (de b.m) antes unos kuantos anyos, kon los byervos sigientes: “…Oy mos permetemos de echar  un grito a todos los lektores kapavles de eskrivir en Judeo-Espanyol”. Les rogamos ke agan un esforsoMa, se estan eskondyendo detras de una timidita o una haraganud ke no es permetida. Veni azeis una preva i no deshar murir el Judeo-Espanyol” (Relatos i Refleksyones 1994).

Entervalo, a la yamada de Karen vino un grande ayudo de afuera, una repuesta kaloroza de los kolaboradores de alta valor. Aktualmente, esta kontinuando a vinir. Tambien, devo mensyonar un nombre ke izo todo su posivle i esta kontinuando en grande mezura a azer, para la publikasyon de la revista. Se trata de muestra kerida amiga Güler Orgun. Es kon los esforsos de todos los amigos ke estamos vyendo el “amanesimyento” al presipyo de kada mez.

Ma, esto regretando de no ser tan pozitiva kuando se trata de la pajina de J-E de muestro jurnal, del “Şalom”. Estamos logrando a mentenerla biva ma, asta kuando?.. Ya lo repeti vezes i vezes ke no mos esta arivando eskritas para esta oja. Syempre me demando la razon, DEKE?? İ no topo la repuesta. Portanto esto konvensida ke aki o afuera ay mas grande potansyel. No kero, no me plaze dezir ke esta eskondido detras de una timidita o haraganud ma, muy probavle esta dayinda, en la “SOLOMBRA” de ande va salir un diya a la luz. Esperando i asperando, Shana Tova a todos los amigos i lektores.